Eh. Sí. Tú. Espierta. Abre los güeyos. Esperézate.
Nun mires al otru llau de la cama. Nun ta.
Non, non, nun coló, nin ta faciendo el desayuno.
Simplemente nun ta.
Enxamás ta.
Nun llores.
Nun ye pa tanto.
Ya, ya, ya sé que te prestaría que tuviere ehi contigo.
Ya sé que te prestaría que t'ensugara les llárimes.
Ya sé que simplemente-y pides un poquiñín más d'antención.
Un puñao más de besos. Un besu. Solo un besu.
Non que respuenda los tos besos, non, eso non; sinon que seya ella quien te dé el besu.
Non que respuenda a los tos mimos, non, eso non; sinon que seya ella quien te dé los mimos.
Ya, lo sé.
Prestaríate que barruntara daqué, que cayera na cuenta de los miles de detalles que faes por ella cada día.
Les tos miraes, la to dedicación, la to entrega, el to esfuerzu.
Prestaríate que barruntara que toos y ca ún los tos movimientos son por ella. Son para ella.
Pero nun lo fae.
O sí?
Y si yes tú el que nun barrunta tolo qu'ella fae por ti ñublao pol borrín del to egoísmo amurniáu?
Y si yes tú el que nun cae na cuenta los sos miles de detalles qu'ella fae per ti cada día?
Y si yes tú el ciegu?
Pero non, nun lo yes.
El xaciu del otru llau de la cama demuestralo.
Tas solu. Con ella. Pero solu.
Haz tiempu que nun te mira como enantes, que nun te busca como enantes, que nun te tastia como enantes.
Que cómo lo sé?
Lo sé. Simplemente lo sé.
Pa dalgo el mi nome ye Sentíu Común.
|
|
Publicar un comentario