Tu nun quies coles coraes, como yo. De nada valen toles camparines d’origami: van morrer mañana. Namás conozo una manera de querer y ye coles uñes, como'l qu'esguila una paré y pide que-y retiren el colchón. Que nada -y amortigüe la inminente cayida. Quierse
cola cañamina, les coraes, los dientes. Quierse cola vida del terminal que va morrer mañana. Quierse como'l que bucia ensin bombona d'osíxenu porque alienda de la to boca. Quierse cola fe del inmortal. Quierse como los amantes que baillen al ritmu de la so sístole, corazón. Quierse ensin fame. Quierse con sede. Quierse como quier l'adolescente que toos los cantares rimen cola so amada.
Quierse de forma atemporal, ensin pasáu, ensin futuru. Porque presente ye que sobre la to cama síamos siempres les dolce en puntu, coles mios piernes marcando los segundos, orgasmos.
Coles medies tintes namás s'escriben hestories a medies, buelgues que se borren.
Tas perdiendote a esgaya, tas perdiendote. Too.
Les Coraes
Agora l'enguedeyu furrula de la siguiente manera: l'inversor ye Dios, los gobiernos los sos Apóstoles y'l restu de los mortales, esto ye, paraos, currantes, pymes y eso qu'enantes nomaben clase media, los nuevos tullíos. Si crees qu'esaxero barrunta los cambeos adoptaos por PSOE y PP dende l'entamu d'esta crisis: Primero, reforma de la Constitución p'afitar un tope de déficit y anteponer el so cumplimientu a tou lo demás. Esto ye, retayar los presupuestos del Estáu onde faiga falta, ensin llendes, cola única intención de cumplir colos inversores. Segundu, reforma llaboral qu'abarata'l despidu y flexibiliza les condiciones de los contratos d'agora (y los que vengan). Esto ye, mano d'obra más barata. Terceru, privatizar los servicios públicos p'animar a los inversores atopar nuevos nichos de negociu. Nesti puntu y por munchu que digan (ensin apurrir pruebes, claro), ye radicalmente falsu qu'una empresa privada consiga desempeñar el mesmu trabayo qu'una pública colos mesmos recursos, menos dineru y aun así dexar un marxe de beneficios pal inversor. Cuartu, amnistía fiscal pa les grandes fortunes y barra llibre pa la creación de SICAVs. Y quintu, xubida d'impuestos al consumu, lo cual amenorga entá más al tullíu y sigue ensin afecta-y al inversor que tributa en Suiza.
Los inversores namás busquen rentabilizar el so dineru. Impórta-yos un coyona cómo s'algame: namás ven cifres. Namás quieren ver blindada la so inversión. Con éses les grandes empreses, dependientes toes elles de los grandes inversores, esploten el camín primeramente esplanáu pol gobiernu que toque p'aumentar los sos marxes de beneficios, y asina caltener contentu al inversor al empar qu'atrayer otros nuevos. Por eso nun ye casual que l'IBEX xuba mientres los sueldos baxen o se destrúi empléu. Por eso nun ye casual que'l telefónicu Alierta o'l capo Botín digan qu'agora n'España entra dineru perdayures. Cómo pa non. Tán na espiral del pexe que se muerde la cola. O meyor dichu: el pexe gordu mordiéndo-y la cola a l'esguín.
Un exemplu claro de too esto ye'l casu la fuelga de recoyida de basures en Madrid. La secuencia ta bien clara: El Conceyu privatiza'l serviciu cola escusa de que sal más baratu (falsu). Les empreses concesionaries amás d'apercibir un bon puñáu de millones pola axudicación, arriquecen al inversor esternu qu'apostó per elles. Les xuntes d'accionistes namás quieren el so marxe de beneficiu, la so cifra, y como l'inversor ye intocable, les empreses retayen pembaxo. ¿Conclusión? Paco, el barrenderu, y otros 999 más, a la puta cai. Y a los esguines nun-yos presta qu'una panda pirañes muérdan-yos la cola. Por eso punsiéronse'n fuelga y les que vendrán, espero. Anque l'alcaldesa intente enmendar los abusos del sector priváu contratando una empresa pública. Asina de cínicos son los lliberales.
Pd: Y paez que dalgunos entá precisen muncha más basura pa reaccionar.
Cuando'l pexe gordu muérde-y la cola al esguín
Foi fascinante y al empar terrorífico escuchar a esa muyer. Los sos güeyos como platos demostraben una ilusión desatamañada pol so trabayu de mierda. Llevaba apenes un mes como secretaria adxunta de dirección nuna empresa ensin futuru, cobrando 700€ (l'arriendu mediu d'una vivienda n'Uviéu son 600€) y amás con un contratu de sustitución per maternidá d'apenes tres meses de duración. Ella sabía qu'en poques selmanes colará a la cai y sicasí non yá asúmelo con total naturalidá si non tamién regalaba tantes hores extra como precisara'l xefe pa demostra-y el so vagar. Amás, agradecía la esperiencia adquirida. El so trabayu consistía en faer fotocopies, ordenar arquivos y sirvir cafés.
La muyer, per otra parte, nun yera nenguna fata: bon manexu del llinguaxe y de les formes, llicenciada en marketing y publicidá, ofimática y nivel altu d'inglés y francés.
Paecióme fascinante, como digo, l'actitú d'aquella moza. Pero ainda pior la fonderada l'asuntu.
El nuesu grau de sumisión algamó tales cotes que inclusive damos sinceres y emotives gracies por consiguir el privilexu de ser esplotaos. Y esa vena que tenemos nel pescuezu yá nun s'enche, yá nun palpita. Inyectáronnos el virus de la resignación. Y nun hai namás peligrosu.
Pd: Resígnate y van faer contigo lo que quieran.
La vena los fatos
Agora na so cama la enganía afala, sóbranos ropa y fáltennos besos y aliendu. En cada rincón qu'esquizamos los xemíos camuden en llicores: barra llibre pa dos llingües con sede. Ciegos de manes, empiecen a falar les uñes.
A puntu como tamos d’españar, desafiando la humedá relativo, Nadia párame’n secu:
- Ponte un condón.
Pero enantes de buscar nel mio pantalón y sacalu del bolsu, Nadia adelántraseme: abre'l primer caxón del so mesilla, saca una caxa de 12 yá desprecintada, busca nel so interior y tiéndeme ún. Ende nun puedo evitar mirar y pensar nel detalle d'una caxa que nun ye virxe, nos condones o los orgasmos que falten (impresos na memoria d'esa mesma cama), na fecha de caducidá de la caxa, nel últimu condón bastardu anterior al mio (¿quién foi?, ¿cuándo foi?). Pero nun puedo nin tengo de dicir nada. Si apenes soi un intrusu nel so propiu presente, ¿cómo querer meteme nel pasáu? Siempres va haber una vida anterior implícita y llóxica (yo tamién lu tuvi) anque irracional ya inevitable n'este mesmu intre. Nengún de los dos nació aquel primer día, naquel bar.
Pensando ensin querer pensar nesto, empiezu a notar qu'el mio cuerpu sigue la xera de la mio mente y obedez a la floxera del pensamientu. Terrible y duru pero blandu a la vegada:
- Nun t’esmolezas – dizme Nadia.
- Nun lo entiendo. Taba tan escitáu, y de sutrucu ...
- Tranquilu. Son coses que pasen.
Nadia dase media vuelta y yo nun puedo dexar de mirar la caxa. Qué complexu ye tou.
Pd: En casos como esti, por desgracia, la mente siempres gana
La Mente Gana
Agora que tou tien un preciu
Ye fácil atopar cualquier cosa. Armes, un sicariu, farlopa, neños, documentos, restos óseos, psiquiatres, medayes. Escueye a la muyer fayadiza d'ente una ristra de cien. Pelo rizao, güeyos escuros, peques, poco pechu, piel amorenada y voz duce. Apaga'l motor y frena el to coche al so altor. Asómate y va averase. Espon les tos necesidaes: Francés, griegu fonderu, sumisión. Axusta un preciu. Colo que pagues nun solo vas mercar el so tiempu; tamién vas anular la so voluntá.
Inventa una escena qu’amernogue los tos traumes:
- Vas nomate Beatriz y vas tratar de resistite. Esforcexamos primero mientres diez minutos, y depués vas dexate llevar y vas finxir que te presta. Vas correte cuando yo me cuerra y vas dormir abrazada a mi, afalagándome'l pelo. Mañana vamos xintar en silenciu mientres yo lleo'l periódicu. Dempués del almuerzu vas poder colar. ¿Tratu fechu?
- Sí.
- Agora dime que me quies.
- Te quiero.
- Dime: Yes l'home de la mio vida.
- Yes l'home de la mio vida.
Nesti casu 500€ equivalen a dos descargues d'espelma machote, trés moratones que va esconder con maquillaxe y un notable descensu nel to nivel d'ansiedá. El vuesu alcuerdu comercial safarate de toa culpa: El preciu ponlu ella. Ella aceptó les tos condiciones.
…………………………………………………………
Nota: ¿Queríes capitalismu? Toma diez taces.
Capitalismu
