Los probes quixeren ser ricos, los ricos entá más ricos y el más ricu de toos tien migrañes o daría hasta l'últimu dólar con tal de recuperar al so difuntu perru Bobby. Cuéstanos estremar l'ansiedá bona de la mala (la primera embúrrianos a vivir; la otra cómenos por dientro). Como sía, consumimos Trankimazin pa les xubíes y Prozac pa les baxaes. Y cuando acesma'l vacíu, cortamos cebolla como coartada pa llorar y eses llárimes reconcíliennos, otra vegada más, col mundu.
Les telenoveles enseñáronnos a amar, Facebook a faer amigos y los bancos a comer cenahories ensin usar les manes. Tenemos correctores de goyeres, allargaores de penes, sostenes milagrosos, futurólogos a 1,16€ el minutu (impuestos indirectos non incluyíos), taxis de puerta a puerta, 51 canales, camises cola marca nel pechu, depilación láser, mascotes, fútbol, planes de pensiones, tarxetes navidiegues d'UNICEF, revistes del corazón, fíos y nietos que nos fadrán inmortales, zoos, cruceros, pitos lletrónicos, el 112, platos precocinaos, estampites del Santu Padre, putes a domiciliu y políticos antroxaos de sacos d'hosties. La culpa siempres ye del otru, ¿visti lo de Sol?, esos si que tienen güevos y me cago nos sindicatos.
Y ante la medrana de la crisis, merquemos sofás más cómodos. Por si'l llombu.
Hipócrites de mierda
Esta mañana tuvi antoxu de patatites frites. Nun ye vezu que l'embagu fadie, pero dacuando xurde fáilo daveres. Per eso enxamás dexo que cole y concénciome que lo meyor ye rindise a la evidencia. Asina qu'apagué'l Winamp, llevanteme de la mesa y fui al cuartín de la empresa onde tan les máquines de café, refrescos y caxigalines de toa mena y colesterol. Nun soi bona clienta delles, préstame más trayer de casa un termu con té y dalgo de fruta y agua nuna neveruca d'eses pa carretar. Dacuando algamé la máquina, tuvi dellos segundos pa dedicime per un productu: cuatru clases de patatites frites distintes. Prestáronme más les ondulaes con sabor a ayu. Númberu 13. Mio númberu de la suerte. Marquelu y el lletretu díxome que taba fora de serviciu. ¿Cómo que fora de serviciu? Pero si toi güeyando la bolsa, y detrás della otra, y otra, y otra. Volví calcar l'ún y'l tres, y les lletres verdes volvieron repetir so mensaxe: fo-ra de ser-vi-ciu. Namái que-y faltó añadir: ¿nun sabes lleer o qué? Intentelo per tercera vegada por si la máquina ufría depresión postvacacional y per tercera vegada díxome que non. ¿Cómo yera posible que tuviere fora de serviciu si taba ehí'l productu?, entrugueme dempués de da-y una patada que fízome güeyar les estrelles. Ehí taben les patates, detrás del cristal, descoyonándose de mí. Entráronme ganes de llorar. Sí, ya sé que ye una babayada, pero les babayaes son les que mueven a los seres humanos y la congoxa espurriome como un aguaceru de sutrucu. Fora de serviciu. Pescancié depués por qué m'entrara'l embagu enantes: yera una señal. Yo tamién toi enllena de cosines [cosiquines, caxigalines] fora de serviciu. Téngoles, siéntoles, puede amás pruyime la necesidá de pidiles pa da-yos sentíu y vida propia, pero si les pido nun soi a devolveles depués. Sé que puedo dar más de mí nel trabayu, sé que puedo ser más xenerosa colos míos, sé que puedo asoleyar más entusiasmu ya ilusión, sé que puedo ser más positiva, más sociable y valiente, sé que puedo vivir más el presente ensín les muries del pasáu. Sé que puedo. Sé que teo toos esos productos, güeyolos tras mio cristal, pero tan fora de serviciu. Encuyi'l llombu y colé pa la tienda la esquina. Pedí dos bolses grandones de patates frites. Había una oferta y regaláronme una caxa de galletes integrales. Otra señal: teo que poneme a dieta.
A Dieta
