Espertó, y él ya nun taba na cama. Nun-y sorprendió, dempués de 10 años casaos, ella sabía qu'él solía llevantase enantes que sonara'l espertaor. Topáronse camín del bañu, y cruciaron un besu que yera más llagaña que saludu. Duchose, vistiose y fizo la cama; sabía qu'él taría desayunando güeyando la Televisión, asina yera dende hai 10 años, asina foi dende que les noticies dexaron tar de fondo a ser l'únicu ruíu que sonaba nesa casa. Ellí topolo, cola tostada y el café; nun entró na cocina, güeyolu unos minutos, como siempres facía, demientres él taba nel so mundiu, cola so tostada y la caída los tipos
d'interes de les noticies.
- Voime -dixo-y ella.
- Ahá -retruco-y él ensin camudar la vista del traxeáu que falaba la bolsa de New York.
Falen los espertos qu'el nuesu celebru ta preparau pa sonar el turullu dacuando dalgo se sal de la rutina. Asina, tras pasar unos minutos y nun escuchar el sonío que produz la puerta'l pesllase y los tacones d'ella al baxar les escaleres; él, o meyor, el so celebru, entainó los güeyos y viola nel mesmu llau onde 2 minutos enantes dixera-y que colara.
Igual ye porque nun yera tan evolucionao como p'asimilar lo qu'elli pasaba, o qu'el turullu dexa reverberacion abondo como pa dexanos abobaos, el casu ye qu'él engrifose ensin pescanciar lo qu'ella taba por decii.
- Voime -volvió decir ella.
Y pa esta vegada, él ya sabía que yera pa siempres.
