Una mañana soleyera nun parque. Música afayaiza de violines. Dellos neños xueguen al fútbol, un señor sonri galoyeru nel so puestín d'algodón duce, mozos namoraos pasien de la mano, dos señores gordes sentaes nun bancu charren animadamente y dan de comer a los palombos.
Los violines paren en secu. Oise un esmolecedor acorde de pianu. Una de les señores gordes quédase en silenciu mirando al infinitu. Llévase les manos al pescuezu con xestu de dolor.
SEÑORA GORDA 1:
-¿Molly? ¿Molly? ¿Tas bien?
SEÑORA GORDA 2:
- …
SEÑORA GORDA 1:
-¡Molly! ¡Di daqué, Molly!
SEÑORA GORDA 2 (tusiendo):
-Uf, cola tontura volví tragar el dentame, fía…
La cámara allóñase. Les señores queden desenfocaes. Güeyamos a ún de los neños futbolistes tiráu nel suelu pámpana abaxo, asollando y calcando'l práu colos puños; los demás neños lleguen corriendo y apínense alredor.
Planu dende embaxo. Vemos un cuerro de cares infantiles esmolecíes, retayaes contra'l cielu.
NEÑU ESPELURCIÁU:
-¡Tommy! ¡Tommy! ¿Tas bien?
NEÑU RUBIO HOSTIABLE:
-¡Di daqué, Tommy! ¿Ónde te duel?
NEÑU GORDÍN:
-¡Que daquién llame a una ambulancia!
Tommy dase la vuelta. Tien llárimes nos güeyos. Ri a risaes.
TOMMY (ente rises):
-Ye que diba meter gol y de secute pensé'l padre de Richie vistíu d'asturiana n'antroxu ¡y cayí de la risa!
Los demás neños rin. La cámara enfoca al puestín d'algodón duce. El señor galoyeru va ratu que xaz inerte sobro la máquina. La so cabeza ye una descomunada y creciente bola rosa d'algodón recién fechu.
****
TÍTULOS DE CREITU. Musiquita chill. Los güeyos fondos del Dr. House. Radiografíes, un corazón llatiendo, neurones, sinapsis, bla bla bla.
****
Ábrense les puertes del hospital. El Dr. House entra acoxando sexy col so elegante cayáu. La so güeyada inquisitiva y sarcástica diz “divos toos a la mierda” pero la so media risada tibia ye la d'un neñu bondadosu qu'entá tien mieu d'amar.
Cuddy entra n'escena con una carpeta na mano.
CUDDY:
-¿House?
HOUSE:
-Non, Cuddy, nun tengo nin idea de por qué daquién querría criar escorpiones nel to bidet. Y nun t'esmolezas por esos simpáticos animalinos, son inmunes al velenu de víbora.
CUDDY:
-House, lleves na ñariz un billete d'un dólar endolcáu…
HOUSE:
-Ah, ye que me dolía un poco la pierna esta mañana. Amás, encántame “el golor del dineru”, ¿ye que nun puede ser ún fan de Tom Cruise nesti hospital?
CUDDY (enséña-y unos informes):
-Señor de trenta años, vendedor d'algodón duce, historial médicu impecable, nin un resfriáu en tola vida, vexetarianu dende siempres, de secute sufre un esmorecimientu ensin motivu, recupera la conocencia de sutrucu ocho minutos dempués y solo diz una palabra: ROSEBUD.
HOUSE:
-Que-y tueyan el celebru y rellénen-y el buecu con gomaespuma. Una de dos, o tien un tumor cerebral en fase terminal o de verdá la so película favorita ye “Ciudadanu Kane”. En dambos casos el celebru vese que nun-y furrula bien.
CUDDY:
-Pero House, millones de persones consideren “Ciudadanu Kane” la meyor película de la hestoria.
HOUSE (güeyada fonda):
-Y millones de mosques comen mierda.
CUDDY:
-La resonancia magnética nun amuesa nada estrañu nel so celebru.
HOUSE:
-Si yo digo que tien un tumor ye que tien un tumor. Que-y endiñen trés sesiones concentraes de quimio. Si nun muerre ye que tenía yo razón, y si muerre pos meyor pal cine.
CUDDY:
-House, ¡nada de quimio! Cuando refugues toles demás posibilidaes tuestes al paciente si quies.
House allóñase pol pasiellu. Cuddy quédase reparándo-y con una espresión complaciente, ente'l ciñu maternal y el namoramientu platónicu, esa típica güeyada que diz: “Aiss, esti House, nun sé si quiero da-y unos azotes nel culu, o tiramelu como si se fora a finase'l mundiu… O igual les dos coses al empar… Sigo, sigo… Azotes, llátex, botes, una fusta… Bonu, que voi, que tengo una xunta”
****
Oficina de House. El sol arrámase per entre les persianes. Foreman, Cameron y Chase esperen sentaos güeyando los sos blocs de notes. Sobro la mesa hai un montón de papeles desordenaos.
House entra na oficina. Quítase la chaqueta y cuélgala nel percheru. Les mangues cortes de la so camisa blanca dexen ver una goma anoyada alredor del so antebrazu esquierdu.
CHASE (visiblemente molestu, señalando'l brazu de House):
-House, lleves una goma anoyada nel brazu.
HOUSE:
-Si ho, púnxila anueche por que nun se m'escaeciera güei preguntar una cosa. ¿Tienes fiebre?
CHASE:
-Non…
HOUSE:
-Pos tas despidíu.
CHASE:
-¡Pero House! Nun tienes nengún motivu pa…
HOUSE:
-Ayeri al roblar el rexistru de salida afitéme en que la to escritura volvióse llixeramente irregular, en concretu los puntos sobro les íes tán desalineaos. Eso solo puede tener trés esplicaciones: arrecíes de fríu, tremecíes pola fiebre, o empieza a manifestase'l Parkinson. Nun podíes tar arreciendo porque tamos n'Agostu y nun furrula l'aire acondicionáu, y acábesme de confirmar que nun tienes fiebre. Asína que tienes Parkinson. Siéntolo, la to carrera de ciruxano acaba de dise al trastu. Pero nun t'esmolezas que d'equí a unos meses a ximelgar cocteleres nun te va ganar naide; trabayu de barman nun te va faltar. Yá voi pasar pol to chigre a beber de baldre.
Chase sal de l'habitación mirando al suelu y abasnando los pies.
HOUSE (mirando a CAMERON):
-Y tu nun t'esmolezas, qu'el Parkinson nun ye una enfermedá de tresmisión sexual.
CAMERON:
-¿Pero cómo supisti que….?
HOUSE:
-La mio inigualable capacidá d'observación, la mio aguda intelixencia, les mios sorprendentes capacidaes deductives… Eso, y la microcámara que-y enllanté ayeri nel pene a Chase cuando dormía'l pigazu nel cuartu de guardia. Anueche tába pasandolo pipa na sala de monitores hasta qu'al desgraciáu del to mozu dio-y por ponese un preservativu. A éstes ties dos caries.
CAMERON (varada):
-¡Pero House!
HOUSE:
-House, House, que me vas gastar el nome y faime falta pa roblar el contratu cola distribuidora de “Una nueche con Cameron”. D'esta forro. Bonu, a ver, ¡diagnósticos diferenciales!
FOREMAN:
-Endocrinoplasmosis. Esplica l'esmorecimientu y los niveles baxos de glucochorroideos.
HOUSE:
-Non. El nivel de chungocitos ye 3.41, ¿dalguna otra babayada? Y nun me digas lupus que te veo llimpiando vasos nel chigre de Chase.
CAMERON:
-Anemia disfuncional esponxiforme. Esplica l'esmorecimientu y siempres va acomuñada d'un 3.41 de chungocitos.
HOUSE:
-Pero a ver, ¿ye qu'equí naide se lleó'l malditu historial? El paciente ye vexetarianu, lo que quier dicir que lleva trenta años atiborrándose a tofu y yogures de soya, lo que quier dicir qu'el so sangre ye ricu en multicalciomas y peptocilococos, lo que quier dicir que si tuviera anemia disfuncional esponxiforme, la falta de glóbulos blancos provocaría que los peptocilococos s'andecharen colos multicalciomas y repararíamos dificultaes respiratories. Ye un tumor cerebral, que te lo digo yo…
Suena'l busca de Foreman. Ésti míralo, depués descuelga el teléfonu qu'hai sobro la mesa y marca un númberu.
-FOREMAN: Sigo, sigo, OK, aína vamos.
Foreman cuelga.
FOREMAN (a House):
-Ye'l paciente, que diz que tien unes ganes lloques d'entamar a sangrar per una oreya pero que ta solo na habitación y vamos perdenos l'ataque; que s'espera hasta que vaigamos p'ellí a entrugar cualesquier babayada pero que deamonos priesa.
****
Habitación del paciente. Turullu estridente de la máquina de pegar turullos. El paciente glaya y retuércise sobro la so cama. Sángra-y una oreya. Los doctores ponen a puntu l'equipu de reanimación. Aplíquen-y cuatro descargues. El zumbíu cesa. El paciente alita y tose.
House restola ente los efectos personales del paciente. Atopa un DVD: “Ciudadanu Kane, el montaxe del director”.
HOUSE (al paciente):
-Norabona. Ye usté un perfechu babayu, lo que refuga'l tumor. Va haber que siguir torturándo-y con dolorosos tests. Ah, llevo'l DVD pa un esperimentu, gracies.
House sal de l'habitación.
PACIENTE (a Foreman):
-¿Quién yera esi fatu?
FOREMAN:
-Greg House, el meyor doctor del país y por tanto del mundu.
PACIENTE:
-Bonu, pos díga-y que'l DVD ye miu.
****
El despachu de Cuddy. El sol arrámase por entre les persianes. Cuddy ta sentada na so mesa guayando'l infinitu con espresión de ciñu maternal. Aparentemente nun ta faciendo nada en concretu.
Suena'l teléfonu. Cuddy descuelga. Oise la voz de House.
HOUSE:
-¿Cuddy? Tienes que venir al mio despachu darréu. L'esperimentu foi un ésitu.
****
Primer planu de los güeyos fondos de House. Güeyen entientes a una mosca que fai círculos sobro'l cristal de la mesa. La cámara allóñase seliquina. A la manzorga, sobro la mesa, vese un tarrín abiertu y una amuesa de fieces arramada sobro'l cristal. A la mandrecha'l DVD del paciente.
HOUSE:
-¿Ves? ¡La mosca nun puede decidise! ¡Acabo de demostrar científicamente que “Ciudadanu Kane” ye una mierda!
CUDDY:
-¡House! ¡Si vas perder el tiempu en babayaes baxes agora mesmu a pasar consulta!
HOUSE:
-Esto ye, que te molo y nun sabes cómo dicimelo.
****
Sala de consultes. Un mozu d'unos venti años espera sentáu sobro una camiya. Tien los güeyos inyectaos en sangre y los llabios moraos.
Ábrise la puerta. Entra House. Quédase mirando al paciente entientes ensin dicir nada.
HOUSE:
-Usté nun precisa una consulta médica, precisa una aspirina y venti dólares.
MOZU:
-Pero…
HOUSE:
-Tien usté nuna mano un aníu de boda nuevecito, y na otra la típica durez de montar muebles d'IKEA, y ta inda frescu. Lo que m'indica qu'acaba usté de camudase a la casa nueva cola so muyer y ayeri terminaron d'amoblar. El pestazo a vieno peleón que me trai indica qu'anueche anduvieron celebrando; tien usté una resaca de mil demonios. Cola aspirina va pasáse-y el dolor de cabeza.
House métise la mano nel bolsu, saca un billete de venti dólares y tiéndelo al paciente, que mira plasmáu.
HOUSE:
-Con estos venti pavos, la próxima vegada que vaiga pega-y al tintorro mércase usté qué menos qu'un riojita, home de dios. Qu'el Don Simón de tetrabrik déxate los llabios moraos.
****
Primer planta del hospital. Primer planu del ascensor. Les puertes ábrense amodo. Dexen ver la risada bonachona de Wilson, l'oncólogo. El cayáu del doctor House corta l'aire con un zumbido. El mangu de plata macizo del cayáu estréllase na risada bonachona de Wilson, l'oncólogo. Salten dos piños. Wilson cai de culu al suelu.
WILSON:
-¡Houz! ¡Ezto nun zien zinguna gdazia! ¿Pod qué lo fiziste?
HOUSE:
-La cuestión nun ye por qué lo fixi, sinón por qué-y das importancia a que lo fixera. ¿acaso ye que t'esmolez el to aspeutu? ¿A qué débise esta repentina ronía por tar curiosu? ¡Dios míu! ¡Tas quedando con daquién! ¿Otra vegada tas tirandote a dalguna de les tos pacientes terminales? ¿Cuántu tiempu fai? ¿¡¡Por qué nun me lo dixeras enantes!!?
WILSON (colos güeyos en blancu):
-Dioz míu, too dame vueltez… Cdeo que voi a dezmayame…
Primer planu de la cara de House. Ceño fruncíu, güeyada perdida. Ta concentráu. Pasen dellos segundos. Espresión de llume repentino. Musiquina d'epifanía.
HOUSE (allóñase rápido acoxando pol pasiellu):
-¡Tou da vueltes, tou da vueltes! ¡El paciente ye maniegu! ¡El paciente TIEN que ser maniegu!
Les puertes del ascensor ciérrense entartallando a Wilson.
****
Habitación del paciente. El sol arrámase pente les persianes (nel hospital de House siempres son les cinco de la tarde). El paciente ta cenando sobro la cama. Foreman y Cameron fáen-y compañía. Entren House y Cuddy. House señala la mano esquierda del paciente, que sostien un cuchiellu. La mano derecha sostien un tenedor. Sobro'l platu hai una hamburguesa de tofu.
HOUSE:
-¡Ahá! ¡Maniegu!
House arrampúña-y el tenedor al paciente.
HOUSE (al paciente):
-Mire atentamente esti tenedor. Nun lo pierda de vista.
House empieza a describir círculos nel aire col tenedor, nel sentíu de les aguyes del reló. El paciente síguelo colos güeyos. De secute, los güeyos del paciente quédense en blancu. El paciente esmorezse y cai de cara contra'l platu de la cena.
House quédase mirando'l so reló de pulsera. Pasen unos minutos.
HOUSE:
-…trés, dos, ún, y…
El paciente vuelve en sí.
PACIENTE:
-Eh… uh…. ¡ROSEBUD!
HOUSE:
-Tien usté dos problemes, mui mal gustu pal cine y trompocitoesclerosis espiriforme inversa. Nun s'esmoleza, nun va usté a morrese. Ye fácilmente tratable.
House empieza la so esplicación. La cámara fai zoom a los güeyos del paciente y entra poles sos pupiles. Vense nervios, texíos, bolines corriendo per dientro de tubitos, chispazos eléctricos y coses d'eses.
HOUSE:
-Usté ye maniegu, polo que los sos trompocitos xiren en sentíu contrariu a les aguyes del reló. Los trompocitos lleven nel sueru ribosódico, que pola so esclerosis va faciéndose-y cada vegada más trupu y va adquiriendo forma d'espiral. Cuando los sos güeyos reparen un movimientu xiratoriu, el celebru unvia un tren de pulsos llétricos a los nervios oculares. Si'l xiru ye nel sentíu de les aguyes del reló, los pulsos llétricos fáen-y efectu bobina coles espirales de los trompocitos, que xiren naturalmente en sentíu contrariu. Esto xúbe-y los niveles alcalinos, que-y esciten los pepticilococos provocando una reacción qu'unvia una señal d'alarma al celebru, qu'amplificada pol efectu bobina provoca un esmorecimientu inminente. Los multicalciomas enchen, lo qu'aumenta la presión nel so pabellón auditivu, y el so organismu espulsa sangre intentando compensar los niveles alcalinos. Tien dos opciones: o dexar de ser vexetarianu, o mercase una máquina d'algodón duce fabricada en Nueva Zelanda, que'l so motor xira en sentíu contrariu. Asina va poder usté reparar tranquilamente cómo se va faciendo l'algodón ensin esmorecese.
Toos sonrin. De nuevu, House taba no cierto. Salvóse otra vida. Cuddy mira con espresión maternal y esa cara de “nun entendí un pijo, pero moyé les bragues”.
Un parque soleyeru. Suena una preciosa música de clarinete. Los paxarucos canten. El verde relluma. Los neños xueguen al fútbol en cámara lenta, los namoraos pasien coyíos de la mano. Un señor sonri galoyeru dende detrás del mostrador del so puestu ambulante d'algodón duce made in New Zealand. La vida sigue, la xente ye feliz.
Se superpone la imaxe del doctor House sentáu en calzones, tocando'l clarinete. Sí ho, House tamién toca'l clarinete. Y con esquisita sensibilidá.
Chase ta sentáu desnudu nel so retrete. Con una mano gárrase'l pene sangrante. Na otra sostien les pinces coles qu'acaba d'estrayer una microcámara. Chase sonri prestáu y complaciente.
Wilson ta cenando a la lluz de les veles con una moza pálida que lleva un pañuelu na cabeza. Ella diz daqué. El ri a risaes, dexando ver dos dientes d'oru.
Cuddy ta sentada nel so retrete, reparando con espresión de ciñu maternal cómo xueguen los escorpiones nel bidet.
House dexa'l clarinete, apaga la lluz y siéntase nel so sofá metanes la clarixa. Métise cuatro Vicodines y péga-y un tragu al so copazo de coñac. Garra'l mandu a distancia. Apunta a la TV y apierta un botón del mandu. Primer planu de la pantalla de la televisión. Apaez el siguiente títulu:
“Ciudadanu Kane, el montaxe del director”.
La tenue lluz de la tele alluma la cara del doctor House, que sonri pícaru.
House, Temporada 20, Episodiu 14
