David Castañón
Aportuna. Cova aportuna. Nun se-y puede negar tenacidá. Cova Tenaces, nómala so hermana ximielga, y enantes faciame gracia oyelo, pero agora que la sufro a diariu non. Yá non. Nun voi quitame la barba. Si quier, pue tar pidiéndolo cada minutu, pero nun voi faer casu. Esta vegada non. Yá son claudicaciones abondes. Primeru'l coletu. Val, aceuté que nun tengo edá pa llevalu y cortélu. Depués, los dientes. A nenguna de los mios ex moces importó-y que tuvieren mal aveníos. Pero llegó Cova y acabé con brackets. Dempués empeñóse en que vendiera la Harley y, anque opunxi fiera resistencia, terminé conduciendo un touterrén. Nun sé pa qué quiero esi armatroste si lo más vera que toi del campu ye cuando riego'l cactus que tengo enriba'l ordenador pa que quite les radiaciones. Colgué les botes del fútbol sala porque a Cova dába-y vergoña que saliera'l campu cola camiseta enllena a españar. Eso precedió a la dieta ultrarrápida que m'impunxo y que convirtió'l mio calter prestosu ya afayaizu nun permanente ceñu fruncíu, pasé a ser un cactus relleno de males radiaciones. Pasóseme citar otra rendición en toa riegla: el tabacu. Nin un pitu más. Nun quiero besar ceniceros, dicía ella, y dempués de someteme a dos meses d'astinencia sexual tiré la toalla. Hubo más derrotes, menos importantes anque igualmente significatives, que fixeron de mi un home sanu, bien vistíu, de perfectu dentame y encaramáu nun coche qu'acoyona. Cova coneuta con una parte de mi qu'algamara caltener a recaldu, porque, nun vamos engañemos, si me sintiera tan estropiáu polos sos cambeos y recambeos nun acabaría venciendo tantu terrén. ¿Quiesme polo que soi o polo que quies que sía?, entrugué-y dempués de que me convenciera pa esprendeme de la mio coleición de tebeos del «Jabato». Claro que te quiero por ti mesmu, pitufín, dixo ella poniéndose falagosa y tirándome con suavidá de la barba. Foi un anunciu de lo que dalgún día atreveríase a pidime. Ella sabía que la barba ye una de les mios señes d'identidá, y qu'ensin ella iba sentime indefensu. Pero Cova escoyó un oxetivu. Y ataca. Ayeri sosprendíla mirando per internet una web sobro máquines d'afaitar. Cuando pescanciose de la mio presencia, pesllóla y dedicóme la so güeyada de gata con ganes de que-y tasquen detrás de la oreya.
Share/Save/Bookmark
David Castañón

Tolos accidentes qu'ufrí na mio vida foron por siguir cola mirada a muyeres caleyantes que rompieron l'iris de mios sentíos. Nel postreru (truñé por detrás a un touterrén) salí del coche corriendo escontra la moza, toqué'l so costazu y cuando se xiró señalé l'accidente y dixi:

- Lo que siento por ti ta nel fumu que sale del capó d'esi coche.

La muyer sacó del so bolsu un kleenex y díxome:

- Te sangra la frente.

Tomé'l kleenex y ella coló. Coló sonriendo.

El mio amor por ella duró lo que tardó'l taller n’iguar el coche. Foi más d'una selmana ensin dormir y ensin xintar víctima del embruxu de los sos güeyos color cian. Polos puntos de sutura que me dieron na frente supi que l'amor siempres duel. Pola cuota extra que me cobró'l seguru supi que l'amor xamás ye baratu.
Share/Save/Bookmark
David Castañón

Almorzamos propaganda. Xintamos propaganda. Cenamos propaganda. Tamién patrocinen los nuesos suaños. Correctores de goyeres, ximnasia pasiva, evacuol, prozac. Vendiéronnos estilos de vida que nun podemos permitinos caltener. Saben que lo sabemos, por eso dempués vendiéronnos esperanza. Y vendiéronnosla tan bien, con un azul de fondu tan guapu y una puesta en escena tan perfecta, que caímos y confiámos-yos el nuesu votu por otros cuatro años. Otra vegada. El pack inclúi amnesia selectiva.

El pack tamién inclúi sumisión. La sodomía qu'antes esgañaba l'Estáu del bienestar agora ye asumida como necesaria: merca vaselina y encamiéntate al Señor. Asumimos ensin gorgutar qu'un asesor del bancu d'inversión Lehman Brothers controle'l Ministeriu d'Economía. Asumimos qu'un asesor nes vientes de bombes de racimu a Gadafi controle agora'l Ministeriu de Defensa. Asumimos qu'una xenófoba a quien naide votó ocupe l'alcaldía de Madrid. Y vamos asumir retayos, xubíes d'impuestos, despidos y lo que faiga falta mientres los mesmos que provocaron esta crisis siguen ganando más y más dineru.

Y a esto, vamos nomalu democracia.

Quixera aisllame, pero nun puedo. Por eso la única salida yes tu pa conmigo, l'amor y les cuatro inviolables esquinines de la to cama. Les nueses nueches y los nuesos besos llibres d'impuestos. Los orgasmos, los afalagos. Duchanos xuntos. Leer un PDF proxectáu nel to llombu. Xugar nel pasiellu a la rayuela.

Pd: Y contigo ye TAN fácil aisllase…

Share/Save/Bookmark