¡Entama la Votación Meyor Blogue 2010!
Un añu más, y ya van tres, entámase la votación al meyor blogue en llingua asturiana del añu.
Esta vegada, les votaciones van facese nuna páxina nueva y con una dinámica diferente al añu pasáu. Les votaciones van sumase automáticamente gracies al software llibre Drupal. Pa votar, vamos esbillar el títulu del blogue d'una llista desplegable, onde vamos intentar que ten el mayor númberu posible de blogues, sicasí, si el nome del blogue que quiés votar nun ta na llista, mándanos un corréu a votalmeyorblogue@gmail.com pa poder amestalu y que tolos blogues tean n'igualdá d'oportunidaes.
Siguimos calteniendo'l votu al meyor blogue y el votu a la meyor estética. Estos dos apartaos van poder votase pola xente que seya autor o autora d'un blogue, pero esti añu amestamos una novedá: tamién el votu de los llectores. A parte del votu de la xente que fai blogues, ufiertamos la posibilidá de medir el votu de los llectores y públicu en xeneral, de forma que'l total de blogues galardonaos, van ser tres:
- Meyor blogue 2010.
- Meyor estética 2010.
- Votu del públicu 2010.
El periodu de votaciones durará, dende'l 1 de xineru de 2011 fasta'l 31 de xineru de 2011. Durante'l mes de febreru y dempués de contabilizar tolos votos, espublizaremos los resultaos.
¡Entama la votación al meyor blogue en llingua asturiana de 2010!
Suerte pa toos y toes.
Ya sé que dalguien tan seguru de sí mesmu nun pescanciará estes coses, pero voi dicíteles igual. Yes de les poques presones que conozo que dacuando entruguen a dalguien cómo ta, ta esperando la rempuesta con interés. Ayeri fui abrir la puerta pa dir a trabayar y nun fui capaz. Nun yera que tuviera escaxeringada, non, digo que nun yera a movela. Quedeme cuayáu delantre una muria maera. La mirilla yera como'l güeyu l'enemigu y paecíame que detrás había dalguien escucándome. Non, nun m'agüeyes asina, nun toi alloriáu. Entovía, anque nun lo descarto si la vida sigue baltiándome cola mesma intensidá que mio güela varexaba les sábanes nel práu. Ella dexábame facelo a vegaes y la verdá ye que prestábame abondo desfogar nel algodón. pamique'l destín tamién-y presta facer lo mesmu conmigo. Pim. Pam. Pum. Perdoname, toi esviándome otra vegada. Soi asina, ya me conoces. Tuvi un cuartu d'hora delantre la puerta, menos mal que mio muyer escaeciera'l móvil y tornó pa recoyelo. Ye posible que tuviera dientro dalgún mensaxe comprometíu. Sé que María engáñame, y en verdá ya nun m'importa. Casi ye un alliviu. Y si ella ta meyor, pa mi nun hai problema. Gracies por nun reite. Yes un collaciu que paga muncho la pena, anque'l resto diga lo contrariu. Que-yos den. ¿Sabes quien farfulló l'otru día de ti? El Maizón. Llevo diez años tropezándome con él nel pasiellu pa los llavabos y él siempres fae'l degomán de desfundar una pistola invisible. Siempres. Dos vegaes al día. Diez vegaes per semana. Cuarenta vegaes per mes. Cuatrocientes ochenta vegaes al añu. Cuatro mil ochocientes vegaes nuna década. Y yo siempres faigo lo mesmu: llévome una mano al corazón y esbabayu: ay. Dos fatos repitiendo la mesma babayada como si nos ficiera gracia. Pues sí, esi tíu nun t'aguanta. Diz que yes prepotente, farrucu y foín. Ye curioso, porque eso ye tolo que yo pienso d'él. Güei abrí la puerta ensin problemes. De xuru que foi namái qu'un argayu. Al otru llau taba mio fía. Tornaba d'una fiesta. Yeren les siete. Facía cuantayá que nun me cruzaba con ella. Nin miró pa mí. Fedía a tabacu y pamique a gómitu. Agora tien el pilu teñíu de verde. Atoleno tres razones pa que lo ficiera. Una porque-y peta. Otra porque piensa que ye una rebelde. Y la cabera, porquie quier llamar l'atención. Namái respeto la primera, anque enxamás pescanciaré porque lo fizo. Fai tiempu qu'arrenuncié abrir so puerta. Por mieu. Por fastíu. Enfocico con collacios que me disparen, con fies que m'esquiven, con díes que varéxenme dafechu. Reiríame si nun me saliera una calentura, ¿pegaríamelo María?
Ye verdá, comporteme como una babaya ensin control. Y nun soi a retrucalu. ¿Vereme obligá a atacar pa nun sentime arrollá pola vergoña? ¿Camudaré inocentes per culpables? Barrunto que non, anque enxamás sedrás a pescanciar tolo qu'una presona fadrá pa escaecer murnies y señaldaes. Too entamó con unes lentilles. Les condelgaes lentilles. Dacuando Antonio, nel "facebook", dixome que-y gustaben les muyeres de güeyos azules, un pinchazu españó'l puñáu d'ilusiones qu'inflara nos dos meses de cortexu virtual. Talantarás que soi persuperficial, escribiome, pero la muyer de mio vida tien los güeyos azules, ye dalgo que siempre supi. ¿Tú cómo los ties?
Amestar so confesión superficial cola so entruga foína yera una bona trapiella, y cayí con too'l equipu. Lo más azules d'Asturies entera, conteste-y. Y, daveres, medraron sos ganes de conoceme "en carne y güesu". En mala hora. Y Xuán, probe Xuán, con tolo que yo quiero a Xuán. Sigún s'acercaba l'alcuentru en terrenu neutral (él yera madrilanu y yo d'Avilés, asina que quedamos en Zamora) amestaba la taútica d'evasión con Xuán y na mio empresa. Y claro, mio rendimientu na empresa pasó de meyorable a tálamente ruinizu. Asina, colé del trabayu de bones maneres y a Xuan cunte-y dalgo d'un "espediente de regulación" y con esi envís animome a dir esi fin de selmana coles amigues de casa rural. Merqué les dichoses lentilles azules y con elles presenteme na cita. Antonio yera dafechu como lu imaxinara, namái qu'un poquiñín más baxu. Lo primero que dixo foi: "anda, has dicho la verdad, son azules". Pero como si nada, y eso molestome, como si lo de los güeyos dixéralo por dicir. Sentome permal, pero lo pior nun llegara ainda. Al despedinos, l'alerxa de les lentilles, que namái yeren un incordiu, medró y camudó nun picazón que fizo que los güeyos enllenáranseme de llárimes. Antonio conmoviose tanto qu'agora quier volver a veme seya como seya. Y yo tamién: por eso toi tan espavoriada.
Xuán, ¿qué pienses?, entrugome María, y nun supe que-y contestar, asina que-y solté: en na. Yera mentira. Atalantaba nel mensaxe que lleera unes hores enantes nel so ordenaor. María escaeciose zarrar la conesión en Hotmail, y asina pudi cucar, namái qu’un ratiquín pero suficiente, a coses [cosines, caxigalines] que prestábame más inorar. “Quien güeya lo que nun debe, topa lo que nun quier[e]”, dicía mio má. Tinía razón, como siempres, pero escaecía qu’a vegaes, el dolor del desconocimientu ye l’unicu camín pa llibrar males mayores. María falaba con so pa nel salón demientres yo cucaba nel so ordenador n’habitación. Aveceme barruntar que la vida mio muyer nun tinía secretos pa min, y que tolo qu’hubiere nesa cuenta correu yeren caxigalines inofensives ya inocentes. Y lo primeru que tope na Bandexa Mensaxes Unviaos foi una puñalá nel corazón. Namái que lleí frases sueltes. Yeren pa un tal Antonio. ¿Quién coño yera esi Antonio? ¿Dalgún collaciu’l trabayu? ¿Dalgún ex? ¿Dalgún refresquin de les escursiones nel monte, de les que fuxía ensin remordimientu? Mio muyer cuntabai a esi Antonio que yo yera a remembrar cualesquier resultáu del Madrid de la cabera década, pero nun yera alcordame del so cumpleaños. Cuntabai que l’agüeyaba mal dacuandu vistía minifalda, pero bien que babeaba con otres en cuantes colábemos de casa. Resfregábame que yo esmolleyara qu’ella mercara ropa percara de marca demientres yo fumaba’l tabacu más caru del mercáu. Escribía-y qu’el sexu conmigo yera pior qu’una sesión de spinning, y que …
María colgó y yo colé de sos secretos. En qué pienses, entrugome demientres cenábemos con un alderique babayos empuercaben nuesu silenciu dende la radiu. En na, retruque-y, y entainé pa carretar el platu al llavavasiyes. Voi pa la cama, toi cansáu. ¿Vienes?, dixe-y.
María gusmió un piescu y dio-y un taragañu con una sorrisina y negó cola tiesta. Non, dixo, teo que manda-y un mail a mio hermana. ¿A tu hermana?, entrugue-y naguando por espeta-y el nome d’Antonio. Sí, dixo ensin amellase, ta amurriña y necesita mimos.
Colé la cocina tan amurniáu que sintía llástima de mí mesmo.
