La xunta taba a puntu d'entamar. Yourrgh llevantó del so asientu la masa verde que yera'l so cuerpu y dixo:
-Saludos collacios. Tengo l'honor de presenta-yos al profesor Xurrrrghh, reputáu exobiólogu espertu en races alieníxenes en víes de desenvolvimientu.
Los presentes na sala palmiaron los sos tentáculos contra la mesa faciendo sonar un mafientu aplausu:
Chof, chof, chof, chof, chof…
Xurrrrghh dió les gracies pola ovación. Llevantóse del so asientu y col so tercer tentáculu esquierdu pulsió'l botón del mandu, empecipiando la presentación de diapositives.
-Saludos. Dirixome a ustedes pa presentar-yos un trabayu tituláu: Les actividaes Gayoleres de los Terrícoles suxuren una recalificación del estatus de la especie a “involucionando”.
Click. Siguiente diapositiva.
- L'estudiu tenía como oxetivu estudiar a los terrícoles demientres les sos actividaes d'ociu. Escaniamos el planeta en busca d'una aglomeración sinificativa de especímenes, y atopamos nel norte de la península Ibérica un asentamientu llamáu Pamplona, onde se taben celebrando unes multitudinaries festividaes n'honor a un tal “Fermín”.
Click.
-Fermín foi lo que se denomina na tierra un “mártir”, palabra humana usada en dellos idiomes de los denominaos “occidentales”. Entá nun conocemos el so significáu, pero abarruntamos que ye un sinónimu de la palabra xaponesa “kamikaze”. La fiesta suponse nel so honor, pero ye difícil d'esplicar.
-¿A qué se refier, profesor?
-Pa celebrar que'l señor Fermín foi degolláu, los terrícoles introducen nos sos organismos grandes cantidáes d'alcohol etílico, por via oral y a xulgar polos llamparones nes sos ropes creemos que tamién per vía cutanea. La conexón ente los eventos escápase a toos los nuesos análisis.
-Esmolecedor… ¿Cuanta xente asiste a esta festividá?
-Más d'un millon de persones. Ye una de les fiestes más conocíes del planeta.
-¿Y por qué ye esto?
-La fiesta foi popularizada por un escritor alcohólicu suicida. Sábese que los terrícoles, por razones entá desconocíes, tienden a idolatrar a aquel artista que se quier quitar a si mesmu la vida y/o que sía adictu a consumir un tóxicu. Estes paecen ser cualidaes almirables nun terrícola, así que pudiera ser que qu'estes fiestes tuvieren empobinaes a promocionar la vida terrícola virtuosa. A lo último consisten en consumir tóxicos y xugase la vida.
-¿Xugase la vida? Expliquese, por favor.
-Va ver, demientres estes fiestes los humanos asusten y provoquen a unos animales domésticos. Depués llibérenlos pa que los escuerran poles estreches cais de la ciudá. Pa faer el traxectu más peligrosu l'eventu entámase a primer hora de la mañana, con una gran parte de los asistentes alcoholizaos ya ensin durmir.
Los científicos mirábense ablucaos.
-Creo nun entender bien. ¿Quiénes son los que fuxen de los animales? ¿Esclavos? ¿Condergaos a muerte? ¿Prisioneros de guerra?
-Eso supunximos la primer vegada que los reparamos, pero la evidencia apunta a que los que cuerren son ciudadanos llibres y voluntarios.
Un murmullo de protesta ya incredulidá alzóse na sala. El profesor Yourrgh protestó:
-¡Esti mar de disparates ye bien difícil de creyer!
-Supunxi qu'esta sería la so reacción, por eso trayí prebes. Pa faer el trabayu de campu mandamos un robot modelu PCHANGA camufláu ente los asistentes del eventu. Voi reproduci-yos una conversación traducida al Xooorgggguiano que caltuvo'l robot con ún de los especímenes humanos.
El profesor Xurrrrghh empecipió una animación holográfica. Un robot metálicu con un pañuelu coloráu al pescuezu charraba con un mozu local, que nun paecía ablucáu por tar charrando con un robot estraterrestre.
-Especimen humanu, respuéndime a esta entruga. La to especie fai unos pocos milenios adomó a los Uros, animales xabaces y daveres peligrosos, escoyendo a los menos agresivos de xeneración en xeneración fasta algamar la especie d'angüañu, la pacífica Bos Taurus. ¿Por qué entós seleccionais a un grupu de machos rabiaos, provocaislos y unviáislos pa escontra vós mesmos? ¿Qué sentíu tenía adomalos nun primer llugar? ¿Nun ye esto lo que la xente de la to cultura calificaría como “una babayada”?
El mozu humanu fixo una pausa pa esgomitar a un llau y retrucó.
-¡Buah, vaya folixa! ¡Yes el mio meyor collaciu, toshtadora que fala! -dixo'l mozu mientres intentaba abrazar a la unidá PCHANGA. Esta, incómoda, intentaba evitar el contautu.
-Humanu, les lleis de respetu interplanetarias dexen atomizar si persiste'l contactu físicu. Tornemos al interrogatoriu. Lo siguiente que faceis colos animales dempués de la corrida ye matalos. ¿Ciertu?
-Dafeshchu, Tosti.
-Tengo una suxerencia, terrícola. ¿Por qué nun matáis a los animales enantes que puedan faevos dañu y depués vos haceis una carrerina?
-Los encierros nun son pediglosos, namás muerre xente dalgunesh vegaesh. Una cada seish años de media.
-¿Pero nun ye la to mesma raza la que dacuando daquién quier saltar dende un edificiu moviliza a bomberos, policíes, psicólogos y familiares pa evitar la traxedia? ¿Por qué esto ye distintu?
El mozu detúvose en secu y dixo bien seriu.
-Porque ye una tradición. Una prestosa, escitante y maraviosa tradición.
-Tradición, conceutu non rexistráu, conceutu non rexistráu… Arrenunciando intentu de comprensión. Siguiente entruga: ¿por qué faer esto con animales teniendo armes más sofisticaes? Podríais, por casu, dar un revolver a cada participante del eventu. Ún d'ellos tando cargáu con una sóla bala. Pero teniendo'l revolver espaciu pa seis bales, namás morrería una persona cada seis años de media.
-¡Pero que dices fatu, eso ye un suicidiu y una llocura!
-Erru fatal, erroorr fataaaaal…
L'holograma perdió intensidá fasta detenese.
-Equí córtase la comunicación. Cómo yera d'esperar, los circuitos lóxicos de la unidá PCHANGA sobrecalentaronse y provocaron un fallu total del sistema.
-Esculpe profesor, interésame la definición de la palabra humana “tradición”. ¿Consiguieron descifrar el so significáu?
-Nel departamentu de Llingüística Alienígena tán trabayando nello. La hipótesis que paez tar ganando fuerza ye “daqué desaxeradamente estúpidu que se repite dacuando”.
-Sí, tien sentíu.
-Digame profesor. ¿Qué opina alrodiu de los terrícoles? N’anterior xunta plantegó incluyílos na llista de “seres intelixentes” y establecer contautu diplomáticu…
-Tengo d'amosame dafechu escontra. Creo que lo meyor ye que sigamos cola política estandar, abducción aleatoria y sondes rectales.
-Sí, toi d'alcuerdu. Van pasar munches sondes polos rectos de los terrícoles primero que deamos el siguiente pasu. Gracies fonderes, profesor Xurrrrghh. Esperamos ansiosos los sos futuros descubrimientos.
-Gracies fonderes a ustedes.
