Tolos accidentes qu'ufrí na mio vida foron por siguir cola mirada a muyeres caleyantes que rompieron l'iris de mios sentíos. Nel postreru (truñé por detrás a un touterrén) salí del coche corriendo escontra la moza, toqué'l so costazu y cuando se xiró señalé l'accidente y dixi:

- Lo que siento por ti ta nel fumu que sale del capó d'esi coche.

La muyer sacó del so bolsu un kleenex y díxome:

- Te sangra la frente.

Tomé'l kleenex y ella coló. Coló sonriendo.

El mio amor por ella duró lo que tardó'l taller n’iguar el coche. Foi más d'una selmana ensin dormir y ensin xintar víctima del embruxu de los sos güeyos color cian. Polos puntos de sutura que me dieron na frente supi que l'amor siempres duel. Pola cuota extra que me cobró'l seguru supi que l'amor xamás ye baratu.

L'accidente

Aisllase

La moza quitó l'abrigu y desmenu aprucieron ante mio cara dos enormes tetes (cubiertes, eso sí, por un finu xerséi de pescuezu vueltu). A güeyu foime imposible discernir si aquelles tetes yeren reales o non. Tampoco-y lo entrugué y non por falta de ganes, sinón por esa llei non escrita del decoru (la mesma que fai de la vida un gran misteriu). Pa mi yera importante saber si aquel fenómenu de la ñatura yera frutu d'un caprichu de dios, o solo dos bunkers de silicona. Esi matiz, pa que pescancies lo qu'intento dicir, condicionaba la mio capacidá de plasmu.

A los homes atráennos les tetes quiciabes por una rara conexón cola nuesa infancia. Y quiciabes tamién por eso yo refugue la silicona (nengún nenu podría sobrevivir zucando una sustanza qu'igual sirve pa sellar ventanes). Amás, el conceutu de guapura natural esbarrúmbaseme. Nun me seduz apalpar una densidá que primeramente foi aprobada nuna xunta d'accionistes, o que tuvo que pasar ciertos controles percima del control de los mios afalagos. Cuéstame almirar un tamañu escoyíu por catálogu, o una forma moldiada nun quirófanu al gustu de la portadora y al pulsu d'un ciruxanu. Y qué dicir de los pezones. Con qué ganes llambes un tetu si nun puedes evitar pensar qu'una vegada foi llevantáu como la tapa de yogur. En fin. Caxigalines.

Les Tetes

Infartos

Pescancié, per milenta vegada na vida, la madre que dexa l'amor cuando falla, cuando s'escuaxaringa de sutrucu y aínda dalgo remanez: anque namái seya un filu onde garrase. O una soga. Hai amores con defeutos de fábrica, con torgues que surden namás finar la garantía: nin van camudátelu por otru igual, nin muncho menos van reembolsate to tiempu (que duel muncho más qu'el dineru).

La madre l'amor

Xá nun busco la felicidá. Yá non. Espero que m'atope ella. Si quier. Si-y prúi conoceme. Nun soi per esixente nin redruñosu. Nun voi tener en cuenta que pasé media vida, y eso son munchos años, pasando fueyes muertes de calendariu, colos sentíos n'estáu d'alerta y rastrexando tolos caminos que percorría esperando atopar en dalguna xera, o en dalgún rellavicu, o en dalgún carcavón, eso que llamen felicidá, y qu'imaxino que consiste en tar tan conforme contigo mesmu y les tos circunstancies que nun desearíes ser otra persona, nin camudar a los tos seres más queríos por otros, nin sustituyir caún de los capítulos del to diariu por pasaxes más intensos y afayadizos. Quiciabes haya xente que sía capaz d'enfrentase a les sos zunes y ponese manes a la obra pa enllenales de sentíu, xente aportunante y creativo que puede entainar el so mundu a partir de materiales nuevos o de ruines que consigue rescatar del argayu. Nun ye'l mio casu. Agora too ta muncho más claro. Nun ye que viera la lluz a la fin del túnel, ye qu'aprendí a caleyar pente tiniebles. Eso faime, si non más precavíu, sí más atentu al suelu que trío. Consiguí que munches coses qu'enantes faíenme un dañu desproporcionáu nun algamen alteriame nin alteriar el mio psoriasis. Llogré, y arguyézome d'ello, qu'el 90 por cientu de los disgustos profesionales muerran nel mesmu momentu que crucio la puerta de salida. Y yá puedo, a lo último llegar a casa ensin que la mio mano dulde un segundu eternu al xirar la llave de la puerta. Les mios llargues llistes de planes pasaron a meyor vida, los mios llibros de autoayuda acabaron nel so sitiu natural, la basura, y l'axenda na qu'encarcelaba los mios díes foi camín de les llaparaes na chimenea pa dame'l preste de ver cómo'l cueru yera tarmiáu por un fueu lliberador.


Sé qu'enxamás voi ser feliz, pero tamién sé que, si dalgún día foralo, sabríalo nel intre: volvería sonrir ensin tener la sensación de que los mios llabios son de plomu..

La Felicidá

El GPS del coche indicóme cruciar la cai, siguir rectu, pero apenes unos metros dempués atopé l'encruz cortáu por una valla y un axente de policía protexiéndola. Al veme'l policía indicóme col brazu que xirara a la derecha.

-¡Nun me fodas, ho! ¡Pero si vivu a la fin d'esa cai!- solté d’esmenu.

-Imposible, caballeru. Ta a puntu de pasar una procesión de Selmana Santa.

-¡Llevo maletes! ¡Y pesen enforma!- reburdié-y.

El policía miróme con resignación, llanzó un sollutu y estremó la valla:

-Ta bien. Pero deténgase nel siguiente encruz y espere a que pase la procesión, ¿d'alcuerdu?

-¡Gracies!

Siguí la marcha fasta'l próximu encruz. Xusto nesos momentos yá taba pasando la cabecera de la procesión. Yera una enorme plataforma móvil con una virxe cubierta toa ella por un mantu de finu encaxe y bordáu n'oru, curiada so un paliu tamién d'oru y arrodiada toa ella de veles con candelabros de plata y enormes ramos de flores fresques. La plataforma movíase bien adulces por aciu decenes de pies humanos, como los tuyos y los míos, colos sos zapatos, los sos calcetos y les sos perneres. Nun yeren ruedes de camión, non. Yeren persones les que llevaben aquello arrecostines. Y con tanta madera y tantu oru tenía pinta de pesar un quintal.

Detrás de la virxe caminaben, en dos files perfectamente coordinaes, muyeres con mantiella y vistíu negru, toes bien series, tirando atristuraes. Y dempués de les muyeres, homes con traxe negru y neños con traxe negru (sí, neños), estos postreros xugando asonsañar a los adultos. Y dempués, más neños serios interpretando con trompetes y tambores non el cantar de Bob Esponxa nin la postrera de Pitbull, non: yera un ritmu más bien atarrecible, como de fin del mundu.

Antes d'esto'l yá sacara'l mio móvil pa grabalo tou. El públicu tamién faía semeyes coles sos smartphones y les sos cámares d'última xeneración. Pero xustu nel momentu de pasar per delantre del mio coche la cola del desfile, cuando pesllaba l'espectáculu un sacerdote con una cruz d'oru y piedres brilloses, entamó a llover con fuerza. La primer reacción del sacerdote foi tapar la cruz con un paragües que nun consiguí aldovinar d'ónde sacó. Depués asomé a la cabecera, y la plataforma cola virxe yá allixerara'l pasu. Agora movíase d'un llau a otru, nivel trotie. El públicu, pela so parte, reaccionó primero escondiendo los sos móviles de l'agua. Depués corrieron toos abellugase nes portalaes más cercanes. Y nos chigres.

Aquella reacción ante l'agua, aquel contraste, dexóme pensatible. Los unos protexendo a la so virxe de l'agua unviada pol mesmu dios al que veneren. Y los otros, protexendo'l so móvil. Condicionaos dambos polos deseños del señor (o pola condensación del vapor d'agua que contienen les nubes).

Igual de fráxiles los dos: l'inventu más antiguu, y l'inventu más recién.

Dioses

Malos Fumos

Dormir colos Güeyos Abiertos

Nun sé a vós, pero yá me cansa enforma tou esti rollu de la sagrada comunión con dios padre y bien señor mio que supon escribir unos calteres nuna caxina de testu y pulsiar “post”. Los blogues, los bloggers, la blogosfera. El twitter, los twitiriteros, la twitosfera. El podcast, los podcasteros, la podcastfera. L'IRC, los IRCeros, la IRCesfera. La radioafición, los radioaficionaos, la radioaficionadosfera. L'egu, los egocéntricos y la egocentrosfera, que ye la única figura xeométrica na que tolos puntos son el centru. Señores y señores, revolución tres revolución tou sigue igual: nun somos más que persones que pasamos la mayor parte del tiempu falando de nós mesmos con cualesquier escusa.

L'egu

Esfórciase por pescanciar a too'l mundiu, anqu'el mundiu nun lo fae con ella. Per eso sigue buscando, caleyando pela xera a la espera de topar les rempuestes a la fin del camín. Quiciabes nun seyan prestoses, pero son les suyes, y quier da-yos abellugu porque namái qu'asina algamara'l sentíu a so vida y caletriará'l mapa que conduz a l'ayalga d'una vida barullona y ensín órdenes, llibre como l'orbayu que suaña con ser etenramente nube perdayures.

Perdayures

Lliar l'Amor

Solu

Prestosu 2014

Prestosu 2014