David Castañón


Entamaba quedame dormidín dacuando dalguien tocome'l llombu.
- Préstame abondo güeyar pola ventanilla demientres el despegue -dixome'l chaval que taba sentáu al mio lláu.
El tio espurrió a charrar ensin parar, que si colaba d’equí pa escribir porque la lliteratura yera so vida, que si escribiera ya seis noveles que-y prestaron muncho a sos collacios, que si diba presentales toes a un concursu, que si dos páxines web apurrieran cachinos delles, que si patatín, que si patatán. Mio momentu de paz finara de sutrucu: otra vegada aguantando un argayu de publicidá engañosa. Merque, merque, merque. Merque mio productu. Mérqueme a mí. Escribo unes noveles perprestoses con megapearls y bífidus activos que son ayalgues de la lliteratura universal y amás llaven más blancu y regulen el colesterol. Merque agora y nun entame pagar fasta febreru. Si nun queda satisfechu ye que ye un amurniáu y un facista. Bla, bla, bla ... Dios, qué ganes de solmenar a aquel tipu.
- .. y claro, yo eso ya lo andecho too na mio lliteratura, porque la lliteratura ye ...
- Perdona, teo que dir al serviciu, ¿déxesme?
Incorporeme y el chaval llevantose del asientu de pasiellu pa dexame salir. Entré nel aseu y quedeme güeyando'l espeyu. Mio reflexu dixo: tío, nun va media hora qu'entamasti to nueva vida y ya ye una ponzoña.
Yera verdá, yeren eses caxigalines de les que taba fartucu: tener qu'aguantar a la xente y so fadiosa propaganda. Nun pasara muncho dende que pescanciara la posición qu'algamara na mayoría de les vides de la xente que m'arrodiaba; dando-y a la situación daqué de romanticismu podía dicise que yo yera dalguien en quien munchos confiaben, una especie de conseyeru, o polo menos eso pensé yo les trescientes primeres tardes que pasié escuchando problemes, encomodos y torgues. Fasta qu'algamé la triste conclusión que too fora tiempu perdíu. La xente nun quier aclarecer sos idegues; lo que quier ye públicu pa la traxicomedia de sos vides. Necesiten ser escuchaos y que se-yos diga lo que quieren oyir; necesiten opiniones suxetives que s'afiten a sos decisiones y sollivien so mala concencia. Si dexen a la pareya depués de pone-y mil vegaes los cuernos quieren que-yos digas que nun se preocupen, qu'el otru teníalo bien merecío por nun apreciar en toa so infinita estensión la pureza inmensa del amor que-y taba apurriendo. Si la pareya dexolos a ellos entós quieren que los afalagues falándo-yos que ye un restallu humanu, qu'hai que ser perbabayu pa colar d'una rellación con una presona maraviosa ya esceicional, y que de xuru que ye lo meyor, porque l'amor verdaderu ta esperándolos a la vuelta la esquina y que si eso del karma furrula, l'otru forfugará camín d'urxencies pa que-y estripen les lladiyes como ñocles que dafechu pegaría-y el cachu putón que s'andará fozando. Darréu dirante aquello de qué buen amigu yes, tio, tú si que m'entiendes, que sería yo sin ti ... La xente quier que-y cuentes cualesquier cosa menos la puta verdá. Nun ye estayu cenciellu escolforase d'enrriba toles rellaciones viciáes onde toos ocupamos un llugar predefiníu, si un día algames la conclusión que tas palanciando to vida y entames a replantegate to posición pente les rellaciones pa colos demás, si yes asoleyar dalgún desalcuerdu con cualesquier actitú, si yes a talantar los problemes de los otros en términos de xusticia, drechu ya ética, entós entamarán a güeyate de llau y facete'l vacíu. L'arremelgu implícitu ta perclaru: o xuegues con nuesos vezos basaos nel más fonderu narcisismu o ya pues podrecete solu nel to apartamentu alquiláu ensin qu'a naidie-y importe. Morrerás de pu[t]ra soledá y to tumba rezará: "equí ta ún d'esos babayos ensin amigos". Flores barates esmorecerán enrriba to tumba un iviernu orbayáu filmáu en blancu y negru y naidie s'alcordará enxamás qu'esististe. Por cabrón y por asocial.
Non, nun me petaba facer una nueva amistá unidireccional. Fuxí d'aquella basoria y nun quería cargar con más. Mexé agustu, llavé les manes, eché agua na cara y colé del bañu. El chaval güeyábame sonriyón. Yo entamé andar pol pasiellu, y pal so dislloque, pasié de llargu. Busqué la siguiente fila vacía (la doce) y acomodeme xunto a la ventaniella izquierda. Nun me prestaba ser tan toscu, pero alcontrábame nuna situación d'emerxencia y la cortesía suspendíase pol momentu. Decreté la llei marcial na mio propia vida.
A los dos minutos dormía como un troncu. 

Share/Save/Bookmark