Colamos fasta Albacete pa intentar refundiar un pocu de lluz sobro esti asuntu. En llegando al establecimientu reparamos una llarga riestra de xente qu'espera pa entrar. Amosemos los nuesos pases de prensa y entremos directos a caxa central, onde seis caxeros van espachando a la vecería a toa velocidá. Toos lleven exemplares del mesmu llibru. Alcontramos a un supervisor, qu'emburria un carrín con más copies de la mesma obra. Coyemos un exemplar y pa la nuesa sorpresa, el títulu (escritu en grandes lletres blanques sobro una semeya borrosa d'una mesa de madera) reza “Cien platos prestosos con cebolla”.
“Perdone, ¿qué ta asocediendo equí?” -entrugámos-y a Braulio Narváez, supervisor del establecimientu. “Esto ye una puta velea” -respuende. “Too entamó'l pasáu vienres pela tarde; una señora averóse a ún de los nuesos caxeros, con un exemplar de ‘Cien platos prestosos con cebolla’ y entrugó-y si yera un llibru de recetes de cocina. ‘Non, señora, ye la cabera novela de Carlos Ruiz Zafón’, respondió'l graciosillo del caxeru, y eso que nos cursos d’iniciación faemos finca en que, anqu'el cliente siempres tien la razón, hai que tratalo como si fora babayu. Pero non, esti chaval tenía que saltar con ironíes, mira tu peronde. Total que la señora llevó cuatro copies y darréu púnxose a llamar a xente pol móvil, pa dici-yos que yá saliera la nueva ‘d'esi escritor tan bonu’. Nun podíamos creelo y nun nos avagó reaccionar. El llunes pela mañana, al dir abrir la tienda, atopamos con un ensame acampáu na puerta”. Preguntamos a Braulio si nun empezó yá a llegar xente a devolver la compra en dándose cuenta del so erru. “Ablucántemente non, de fechu paez ser que'l llibru ta gustando enforma. Hai un montón de xente que lléelu y vien a por más. El martes tuvimos que llamar a almacén central y pidir más copies; el camión de repartida dio yá catorce viaxes”.
Averamos a un señor con barba qu'acaba de llevase diez copies. “Bones tardes, caballeru”. “Un momentu”, -diznos, y échase mano al bolsu. Saca una pipa, préndela seliquina y diz: “Yá. Ye qu'ensin pipa sientome como desnudu”. Preguntamos al individuu si yá lleó la novela. “Fícelo en malapenes trés díes. Ye, cenciellamente y a falta d'una palabra meyor, escelsa“. Preguntámos-y pol argumentu. “Pos un pocu de too: la vida, la memoria, la perda de la inocencia, el pasu del tiempu. Lo que d'entamu pudieren paecer llugares comunes en lliteratura, reinvéntense nesta proeza narrativa que fai un usu rompedor del recursu de la metáfora: hai un pasaxe en que l'autor, dende'l cenciellu prisma d'un puré de calabacín, agasáyanos con un certeru analís sobro los prexuicios sociales” -cúntanos. “¿Y cómo ye que vuelve usté a por otros diez exemplares?” -preguntámos-y, pa rematar la improvisada entrevista. “Pos son pa regalu. Va ver, ye que tengo dellos amigos d'esos qu'a la que pueden suéltente pomposamente aquello de ‘nós en casa nun vemos muncha televisión, preferimos un bon llibru’, pero qu'en realidá nun pasaron del Códigu Davinchi esi tan cacarexáu. Asína que voi sosprende-yos con un pocu de bona lliteratura, a ver si danse cuenta d'una vegada de qu'esto ye un tema seriu y non una simple pose estética. Home por dios”.
“La novela ta increíblemente bien estructurada” -cúntanos una moza con grandes gafes de pasta que lleva una media verde y otra azul. “Son cien capítulos caún cola so pequeña subtrama dixebrada, pero tou xirando alredor del argumentu central. Termines un capítulu y quedes refalfiáu, pero coles mesmes engabítate y quies más. Ye un recursu que se llama cliffhanger, por si nun lo sabíes. Yo ye que tengo un blogue d'enclinos” -conclúi.
Despidímonos de Brauio, el supervisor, agradeciéndo-y so tiempu. Pa poner puntu y final a la nuesa visita, preguntámos-y si nun cree qu'esti asuntu va acabar españando per dalgún llau. “Pos la verdá, qué quies que te diga, a mí a estos altores yá m'importa trés coyones” -indica.
