Manuela coló y faciendo honor a so fama de muyer astuta y redruñosa, llevose too menos les cremes y les muestres de perfumes. A mí nun m'importaba que fora astuta y redruñosa pa colos demás, pero fodiome a esgaya que fora asina conmigu. Si ya nun sintía por mí lo mesmu que dicía sintir dacuando entamamos a salir xuntios, polo menos podía tener la consideranza que yo me portara con ella en tou momento con un repeutu absolutu, ensin sometela al siempre fadiosu apiertu d'aguantar a un home despecháu y llorón que suplica per otra oportunidá. Entró na mio vida de sutrucu y coló con un portazu. Cuéntolo porque tien gracia, o eso creo: yo diba pol pasiellu del supermercáu dacuando Manuela amiyó a toa velocidá sobre sos patines y estampose escontra mí. Despistose güeyando a un cliente asemeyáu a Edward Norton, so actor más prestosu. Taba claru que nun yera Norton, y tamién taba claro qu'enxamás fixaríase'n mí de nun ser pol accidente inesperáu. Manuela sintiose'n deuda conmigo (o quiciabes tinía miéu qu'el mi testimoniu pusiérala de patines na cai), pidiome mil perdones y dexome'l so númberu de teléfonu por si necesitaba daqué o mancábame'l golpe. Llamela pela nueche y'l númeru yera falsu. Al día siguiente torné al supermercáu dacuandu diba pesllar y abordela. Nin avergoñose nin púnsose roxa, tolo contratio, díxome que salía nun cuartu d'hora y que si la esperaba invitábame tomar un café. Fízolu y pasolo perbien conmigu, en verdá que nes distancies curties teo cierto encantu: soi inxeniosu, falo de cualesquier cosa [cosina, caxigalina] y sé escuchar. Diome una oportunidá, enxamás una segunda, y dexó'l terrenu mináu con sos perfumes y cremes. Nun sabe con quien ta tratando, pueden argayame una vegada, enxamás una segunda; asina qu'uso'l mi cuerpu como campu d'esterminiu pa so alcordanza: goliendo como ella protéxome de so ausencia. Soi raru, suena raru, ye raru. Pero furrula. Y nun solo eso: mios collacies d'oficina barrunten que goler cada dos o tres díes a perfumes femeninos distintos sinifica que soi un seductor con una fértil collecha de pieles foriates. Y, pa dalgunes delles, eso ye perescitante. Asina, qu'ensin pretendelo, Manuela fizo de so fuxida envelenada un antídotu escontra mio soledá.
So Perfume
