David Castañón


Esti caberu martes tuvi un alcuentru con un vieyu collaciu del colexu que nun güeyaba dende cuantayá y que topé gracies a la rede social Facebook; que ye mésmamente pa eso, p'algamar xente que nun güeyes dende fai años.

Quedamos nun bar, embrazámonos con falsu prestu, pidimos unes cerveces .... y fináronse los temes de conversación. 

Digo-y, por dicir daqué: 

- Mimanto, pa lo que sirve'l Facebook, eh?

Ríse, como si tuviere quedándome con él, y espétame: 

- Si Facebook fora namai que p'alcontrame contigo entos quitaría internet de casa. Facebook camudome mio vida, en verdá. 

- ¿Pa tanto ye? - entrugue-y.

- Mira p'alla - señalando la cai al travies la cristalerela'l chigre-. Maxínate que toles muyeres que tan pasando pela cai tuvieren un cartelu nel culu que punsiera "toi nuna rellación perenguedeyá", o "soi soltera", o "namái qu'ando a la gueta d'amistá", o "préstenme los homes y tamién les muyeres" ...

Faigo como diz mio collaciu, miro pela ventana'l bar haza la cai y güeyo'l color del branu de Xixón: rubies, morenes, roxes, asturianes, foriates, madures, mocines ... de too. Mio collaciu apiértame'l brazu y dizme:

- Maxínate qu'aquella mocina que crucia pela carretera tien un cartelu que punsiera: "fai dos díes qu'ando amurniada". 

Tener esa información ye un privilexiu pa facer cálculos mentales y entra-yos a toes. 

- Tas encaloriándote, calménate un poquiñín -digo-y. 

Pero él sigue dando-y:

- ¿Cuantu meyor sería hai diez, quince años, si tuviéramos toes eses güeyaes de les compañeres del colexu, la universidá, de les compañeres nel trabayu, de les ex novies?

Maxinelu, y mio collaciu tinía muncha razón. 

- La muyer analóxica, la del caberu sieglu, morrió. ¿Alcuérdaste de toles entrugues qu'ún facíase enantes? "¿Tendrá noviu? ¿Qué música-y prestará? ¿Ye bon momentu pa entra-y?" -remembra'l mio amigu-. Agora la muyer dixital indícatelo too nel so perfil de Facebook. Cualesquier collacia la oficina, cualesquier amiga d'una amiga, avísate si peleose col noviu, esplícate si-y presta Neruda o Bucay, ponte semeyes de les sos vacaciones n'Ibiza, ¡p'agüeyales en porrica! ¿Alcuérdaste tolo que tardábemos nos ochenta en güeyar a la moza en bikini? Teníemos qu'esperar a güeyales un día na playa y de refilón, nun fora que te calcara una hostia. Nomeno, la vida meyoró la de dios.

- Bueno, ho, pero tampoco será tan fácil. 

- Ya, ya, hai delles desventayes, como too -dixome-. Pues namorate pa tola vida, o espertar al día siguiente con un ferrón ... Pero'n Facebook ties delles escaramuces, trucos que garres cola esperencia.

- ¿Por exemplu?

- Cola perlloñe de les muyeres que ponen la so fecha ñacimientu ensin escribir l'añu: a éses ya-yos cayeron les tetes. Cola de les que cuelguen semeyes a esgaya de les sos mascotes: son depresives. Nin t'acerques a les qu'asemeyen tar coyonudes pero nun faen más que poner primeros planos en contrapicao: son gordes con complexu barbada. Si dicen tar "nunca rellación difícil", y tienen más de treinta semeyes besando'l mismo tiu, fuxe: dempués de follar, lloren. 

- Impresionante -espete-y, ablucáu. 

- Hai qu'arispiase de les que, na imaxen del perfil, ponen una semeya d'elles en bañu. Éses, dempués de cuatru gasayos nel Muriu, tan sollinguando por ti. Atentu a les que ponen semeyes viaxando pel mundiu con una amiga, y siempres la mesma amiga: son folixeres. (Pero cuidáu: tien que ser pel mundiu, si ye pel mesmu país, son histériques). Les qu'asoleyen semeyes d'elles dacuando yeres neñes, en sepia, présta-yos abondo'l sexu duru. Les que dexen vacíu l'ítem sobre intereses musicales, prefieren pagar l'hotel a medies ...

Mio antigüu collacio'l colexu enfarxopetome conseyos, pero namai que m'alcuerdo d'estos pa cuntávoslos. Tracalexome más d'una hora, ensin ensalendar. Y dempués díxome que colaba porque quedara con una muyer que conociera na estación del tren. 

- Trémenme les manes- confesome enantes salir del bar-. Esta muyer nun tien interné. Nun sé ná d'ella, enxamás güeyé sos semeyes, nun sé de qué vamos falar.

- ¿Y entós pa qué vas?

- Ye qu'a lo caberu calécenme abondo les muyeres analóxiques. Güelen a enfancia. 

Share/Save/Bookmark
David Castañón
Darréu amiyó lo pior. Na. Na de na pente 10 años. Na demientres 3652 dies y 3652 nueches. Finó'l xuegu. Los xuegos. El sal de mio existencia. Entarabuqué mio vida como los protagonistes d'una traxedia, Hermione en versión tio. Onde toi, qué fice, qué debo facer agora, qu'allorie m'argaya, qué dolor m'apierta. Nun sé si amo o si odio. Ella matome, asesinome, degollome, capome, acepiyome, esñucome, espanzome, amortiome, apelucome, guldrome, hachuquinome, follome y delles otres rimes babayes. Fasta qu'escaecilo y conformeme cola desaboría felicidá de mio esistencia.
L'amor, la familia, el trabayu, l'antena parabólica.
Ésa yera mio vida a los 35 años. Teníalo too: 1 muyer, 2 fios, 3 collacios, 4 préstamos, 5 semanes de vacaciones, 6 años d'antigüedá na empresa, 7 vegaes mio pesu n'equipos de soníu, 8 coitos conxugales per trimestre, 9 vegaes el perímetru terrestre n'envases de plásticu, bandexes de poliestilenu y dellos envoltorios alimentarios non biodegradables, y 10 años ensin saber d'ella. La felicidá. El llote completu del tiranu que siempres quixi ser dende nenu. Asina que ser adulto yera esto: tener un velocímetru qu'asoleya de 0 a 210, pero qu'enxamás va dir a más de 60.
Share/Save/Bookmark