Eh, tú.
Sí, tú.
Nun m'agüeyes asina, sé qu'en realidá nun te sospriendes, tas faciendote la despistada, y nun sé por qué, si namái dixi que quiero qu'esta nueche vaigamos baillar. Que quiero que vaigamos de folixa, que me lleves a un sitiu caru y que bebamos fasta chumanos.
Prestaríame ...
Prestaríame dir a un restorán. Sí, sí. A ési al que namái vamos tú y yo, y quedanos fasta les 1000, y si piesllen, que piesllen con nós dientro.
Amás sé fasta lo qué voi pidir, nun preciso nin la carta, nin tiempu p'albidralo, voi dicilo asina, de carrerilla, igual que recitaba les preposiciones de pequeñu cuando me les entrugaba la mayestra.
D'entrante quiero una tabla de besos variaos, pa dir abriendo boca, o meyor dichu, pa picar ente los dos.
Una vegada que'l platu quede vacíu y fárteme d'embadurnarme les manes col sabor de los besos, voi tomar una ensalada de la casa, d'eses que pon la carta que tienen un pocu de too: afalagos, abrazos, gasayos, sorpreses inesperaes y miraes enceses. Pero, si déxaseme (y sé que se me va dexar) quedría poder usar el mio propiu aliñu, el qu'uso siempres: deséu a esgaya entemecíu con zusmios revoltosos.
Y, de segundu ... De segundu quiero'l to cuerpu.
Ensin aderezos. Namá'l to cuerpu al platu, pa poneme les botes besando, afalagando, llambiendo, percorriendo, fartucando, esneldando, empachándome. De ti.
Pa beber voi pidir les tos pallabres bisbisaes en voz baxa y al escuchu. Y de postre voi tomar l'últimu abrazu de la nueche, pero tomarélu, si puede ser, yá acurrucáu ente les tos sábanes.
Nun voi tomar café o fervinchu, si acasu un clin de te quiero con llocura.
Eh, tú.
Sí, tú.
Dime que me vas llevar a baillar.
