Ñaz, gatea, di papá y mamá, xinta de too, nun berres de nueche pa durmir, deprende a mexar y cagar solu, vete a la guardería, pórtate bien, sé bonu, vete a la escuela, pórtate bien, sé bonu, da besos dacuando te los piden, fae amigos, estudia, estudia, estudia, sé bonu, a les 11 pa la cama, fala bien, vete a misa, estudia, estudia, estudia, fae deporte, pero estudia, estudia, estudia, vete al instituto, estudia, estudia, estudia, nun salgas, nun t'emborraches, nun te drogues, cuidao coles muyeres, a les 11 na casa, estudia, estudia, estudia, namórate, ten moza, fae sexo seguru, nun salgas, nun t'emborraches, nun te drogues, estudia, estudia, estudia, nun faes más que pidir perres, vete a la universidá, saca una carrera, estudia, estudia, estudia, nun salgas, nun t'emborraches, nun te drogues, a les 5 na casa, cuántos años piensas tar viviendo de la sopa boba?, estudia, estudia, estudia, fina la carrera, trabaya, trabaya, trabaya, que ye que nun ties moza?, nun piensas independizate?, cásate, cásate, cásate, trabaya, trabaya, trabaya, merca coche, merca pisu, hi-po-té-ca-te, trabaya, trabaya, trabaya, decora la casa per Navidá, cena con tos/sos pas en Nuechibona, cena con tos/sos pas en Nuechivieya, vete a bodes, ten un fiu, merca un coche mayor, merca una tele mayor, merca un pisu mayor, trabaya, trabaya, trabaya, sé bon padre, sé bon maríu, trabaya, trabaya, trabaya, hola, cariño, qué tal, bones nueches, vete a misa col to fiu, vete de vacaciones, enseña les semeyes de les vacaciones, pon bona cara, sé feliz, discuti de fútbol, discuti de política, merca'l periódicu, merca reis, sé bon vecín, quiere a to suegra, ten otru guaxe, sé bon padre, trabaya, trabaya, trabaya, sal los domingos a pasiar en bici, vota, nel branu vete a la playa, n'iviernu quedate na casa, xubílate, cuida los nietos, contempla los nietos, educa los nietos, condena lo que toque condenar esí día, cellebra lo que toque cellebrar esi día, axunta la familia los domingos, sé bon güelu, sé bon suegru, sé bon pa, sé bon maríu, sé feliz. Muérete. Non, mentira, ya tas muertu dende cuantayá.
Dixebra - Aselecer
Aselecer
Taba de llombu d'ella y pudi agüeyala perbien, tolo que quise, arrequexáu. Demientres esos minutos, tuvi ablucáu y alvertí qu'esta vegada nun podía dexala escapar. Asina, llevanteme la siella y avereme la barra. Pidii al camareru otru café y dempués, mirela y pidii el periódicu como si fuere lleer la bolsa.
- Yo sé quien yes -dixo, apurriéndome'l periódicu-. ¿Escaecístelu? Hai unes selmanes zarapicamos, les tos semeyes cayeron al suelu ....
Garré un taburete y senteme a la veriquina d'ella. Golía perbien y l'aroma paeciome familiar.
- ¿Pares muncho perequi? -entrugue-y, xugando cola cuchara'l café.
- Tolos miércoles si nun toi de viaxe. Voi a clas de pianu y darréu préstame tomar un cafetín equi, faen perbon café.
Agüeyé sos manes, manes grandes de deos como llimiagos y uñes curties y cuadraes.
- Yo vivo cerca y desayuno casi toles mañanes equi. Amás del café, faen los meyores frixuelos que probaras enxamás.
- Umm, m'encanten los frixuelos.
- ¡Con ñata y caramelu!
- ¡Sí, sí, con muncha nata y caramelu!
Rimos los dos a rabu estalláu.
- La prósima vegada voi probales.
- ¿Cuál ye'l to nome? -Entrugue-y dempués d'agueyala seliquín unos segundos.
- Taresa.
- Prestosu nome.
- Asina yera la mio güela.
Tuvimos más d'una hora falando y falando. Esi foi el primer miércoles de munchos más falando mentantes tomábamos un café. Concedíame'l don d'agüeyala y yo agradecíalo muncho.
Un miércoles fui cola mio cámara pa sacar semeyes. Saliendo la cafetería dixe-y:
- ¿Puedo?
Agüeyome ablucada.
- ¿Equí? -dixo mirando pa tolos llaos.
- Sí, la lluz ye perfecha y tú tas xenial.
Dafechu taba preciosa: vaqueros prietos con botes, y un xerséi rosa embaxu'l so abrigu cueru.
- Nun sé ...
Saqué la Nikon F2 dela fardela y entamé sacai semeyes demientres rodiábala. Ella sonreía y agueyaba la cámara encuyía. Eso facía que me prestara más ainda, yera preciosa.
- ¿Siempre yes a salite cola tuya? -entrugóme ensin borriar la sonrisa.
- Casi siempres.
Pasó un home y dixei que nos sacara una xuntios. Quería tenela conmigo pa siempres.
- ¿Pue sacanos una semeya a mio amiga y a mí?
- Si, ho, ¿onde-y teo que dar?
Esplique-ylo.
Avereme a Taresa y garrela pola cintura.
- ¿Ya?
- Si, apierte'l botón.
Saconos dos semeyes, una n'horizontal y la otra'n vertical.
- ¿A qué dirección puedo mandales?
Mirome como sabiendo qu'aquella yera la entruga que taba na mio mente dende'l principio.
- Doitela, pero prométeme que voi salir guapa.
Llevanté mio mano.
- Pallabra d'honor.
- Confiaré en ti.
Sacó una tarxeta del bolsu y diomela.
Y dende esi momentu, nun hubo momento'n que me separtara d'ella ...
La Semeya
