De bona gana chapuciaba nun riu enllenu cocodriellos enantes de picar n'aquella puerte. Detrás d'ella taba mio fía, o polo menos debería tar. Lo que ya nun sé, y pamique naidie sabe, ye'l so estáu d'ánimu. La llercia a topalu esmoleciome cuantayá. Remordimientu, sobremanera. Ye verdá qu'aconceyo tolos requisitos pa ser un pa zafiu. Tamién ye verdá que ye tardi pa desenguedeyalu. L'autoengañu nun ye una de mios zunes. Pico na puerte dafechu golpiando nel cientro'l cartelu que pon STOP. ¡Entra! Abro seliquín la muria. Fai tanto tiempu que nun visito aquella estaya mio ca que paez que ye la primer vegada qu'agüeyo esa habitación. La paré de color azulón nun tien nenguna semeya o poster. La cama d'1'50 tien cabeceru de fierru. Nun hai alfombres. Namái qu'abluqué con aquel peluche que-y regalé cuando entovía yera una neña y qu'ainda reinaba enrriba so cama. Xunto a la ventana, una mesa blanca con un ordenaor portatil zarráu. Y sentada al lláu, mio fia esgarabatiando nun cd. Música pirata, maxino. Quedeme paráu na puerte güeyándola como si fuere una foriata, una estraña. Nun m'atrevía a entruga-y porqué-y dio por atixerar el pilu y teñilo d'azul. Anque quiciabes lleve selmanes asina y yo nun lo pescanciara. Cuantayá que-y viera'l piercing na llingua y dacuandu entrugue-y per él, María reburdió. Seis meses dempués entéreste de los estropicios de la to fia, espetome. Estropicios, dixo. Sí, ye una bona definición. Entro y siéntome nel borde de la cama. Quédate bien l'azul, digo-y. Lucía camuda la güeyada atenta por una d'incredulidá. Gracies, tu muyer diz que ye perfeu. Ya sabes cómo ye tu ma, mui clásica. Lo mesmo qu'ella diz de ti, retrúcame. Nun dixe que me guste, namái que quédate bien. Supongo que tas equi pa pescanciar porqué falto tanto a clas, dizme. Asiento-y cola tiesta. Si nun voi a clas ye porque espiértome tolos dies con una angoxa que m'apierta'l pechu y nun me dexa ensalendar; y si tuviere que tar pente cuatro paredes soportiando profesores fatos, con enseñances fates y compañeros fatos, finaría tirándome pela ventana, ¿entiéndeslo? Sí, pásame lo mesmu tolos díes nel mi trabayu, pero ¿sabes por qué voi? Encueye'l llombu, y dizme, sí, porque te paguen. Y déxame ensin pallabres pa retrucai.
Coses, Cosines, Caxigalines (IV)
Publicar un comentario