Sicasí dalgo dicía que, tras d'aquella aparecencia, había munchu más; un llinguaxe non asoleyáu, secretu, ocultu, baldáu, que namái pescanciaba ella (y nin siquiera). Y ye que demientres él falaba de babayaes, ella asemeyaba escuchalu colos güeyos, clisándolos pa so boca, como si fuere víctima d'un agüeyu o fechizu cuyu antídotu sólo tuvieres tres los llabios d'él, embaxu so llingua o pente esos dientes brillosos y perfeutos.
Y en verdá yera perbono nel difícil arte de mover los llabios, les ceyes y la espresión de los güeyos en perfeuta (y prestosa, y deliciosa) consonancia. Yera como si envede falar, ballara colos pies del so rostru.
Pa ella de xuru que sedría muncho más fácil si él namái fora guapu. Los homes guapos namái qu'entren pol güeyu. Los atrautivos, non. Y él yera atrautivu, peratrautivu, vaya si lo yera. Tinía la gracia natural de quien seduz ensin querelu. Una voz melguera, sensible, prestosa, de cuerdes vocales perfeutamente peinaes, llabios pa xintar y retayos de señaldá na güeyada. El típicu home que no-y presta a cualesquier, pero dacuando presta, atrapa. Y ella nun podía evitar sintise presa, anque creyía saber evitalo, polo menos dende fora, pero siempres había daqué que l'asoleyaba, que s'esguilaba y s'esguila al control de cualesquier vezu entrenáu.
Ella, dafechu, quier morrer por mor d'una atracción que ye d'otra: dalguna muyer bienenfortunada qu'ella nun conoz nin quier conocer, la muyer d'él, so esposa. Y esmordigaña los llabios, siempres güeyando pa so boca, llamentando nun conocelo unos añinos atrás, dacuando'l destín entá podía escribilu del so puñu y lletra ensin manchones de Tipp-Ex.
La cuenta pagola él. Normal. La d'ella sedría impagable.
|
|
Publicar un comentario