Pa qué voi engañavos: tarrezo'l heavy metal, nun me presta'l rock y el pop ponme enfermu. Conclusión: ¿qué fago saliendo con dalguien como Sonia que ye seguidora incansable d'eses músiques? Amás, si ella ye de Fanta y yo de KAS, si ella ye de vinu y yo de sidre, si ella ye de güisky y yo de ron. ¿Nun abultavos bastante pa dixebranos enantes que seya tardi? Sí, lo ye; pero Sonia ye d'eses muyeres nomaes Xanes dela Nueche, ye dicir, muyeres que pol día son invisibles y dacuando retírase la lluz y aporta la escuridá camúdanse nuna d'eses criatures con lluz propia de les que nun te puedes separtar. Nun sé que ye d'ella cola alborada, ainda nun cruciamos esa portiella, pero pamique entós esapaez esi rellumu, torna'l gris de la media y el conxuru torna en malgüeyu. Quiciabes descúbralo esta nueche, dacuando muerra la nueche. Güei toca un grupu de heavy metal y ella tien dos entraes. "Güei vamos de conciertu", anunciome con un mensaxe nel móvil. Nun discutí: ye una demostración de brenga por so parte y una regla non escrita del bon defensor ye asemeyar más debilidá de la qu'en verdá se tien. Asina qu'equi toi, esperando y esesperáu demientres entren los caberos d'una fauna qu'agüeya mio vistimientu con refalfiu. Y ye qu'un polu de Ralph Lauren y unos chinos de Caramelo nun ye lo meyor pente tanta chupa cueru y vaqueru despernáu, pero mio estaya picotera entainó'l día guerrera. Los dos seguratas de la entrada tampoco ye que me miren meyor. Lo qu'hai que facer p'añadir un cupón a mio cartilla de sexu gusmión. Saco'l móvil y a metá de númberu apaez Sonia per detrás p'abrazame y mordigañame la oreya. Lieme nel ximnasiu, dizme, y ye verdá qu'el so pilu güel a xampú y ta moyáu, anque pue ser d'agua de vestuariu o d'agua d'amante. Nun me fio d'ella pero ella entama sentise segura con mis renuncies. Créeme atrapau. Nun teo ganes de dir al conciertu, dizme ella, melguera, ¿colamos pa tu casa?
Xubimos a un taxi. La conductora bordia un pañuelu. Digo-y mio dirección y Sonia derrítese nel asientu. Saliome un granu, xime. ¿Onde?, entrugo-y, porque la cara la tien llimpia. Y ella rii ... Ya lu verás.
Sonia
Publicar un comentario