Esti domingu tuvi la suerte deprender una de les meyores lleiciones d'estratexia, brenga, colocación, remate y taútica qu'enxamás naidie recibiera. Y pa encima foi de baldre. Taba sentáu nun chigre tomando una botellina sidre, dacuando apurriéronseme 3 paisanos (qué paisanos, 3 espertos) y punsiéronse agüeyar la televisión. Nesi momentu, salía Fernando Alonso nel so Fórmula 1 y ún d'ellos asoleyó tola so sabencia y espliconos porque Alonso esti añu taba mal. "Alonso ye fatu, nun tien nin puta idega d'adelantar nes curves, míralu ho, ye que nun sabe nin salir bien de boxes, y ya nun te falo los mecánicos - dicía demientres los otros 2 asentién güeyándolu ablucaos- mira como van los reglaxes, si ye que nun tien ni puta idega, pa enrriba escoyió mal los neumáticos y enllenose combustible, asina nun gana na vida. Paquete!". Dende esi momentu, sé cómo tien que llevar Fernando Alonso los reglaxes, el combustible y los neumáticos, pero ehí nun fina too. Finó la carrera d'Alonso, que quedó quintu, y entamó'l Master de Tenis onde xugaba Rafa Nadal. El paisanu dexo-y esplayase al otru collaciu demientres él pidía otra botellina Viuda d'Anxelón y soltaba un "ta de restallu". "Cagunmimantu el guaje esti -dicía'l segundu espertu dempués del segundu fallu consecutivu de Nadal-, dende que ye'l Número Ún del Mundiu y dieron-y los Premios Principiegos nun da una. Ta amariconáu, ¿nun ves que nun corre? Ye que cueye mal la raqueta, amás que da la bola percortada y asina ye imposible. ¿Visti? Si ye que xuega siempres no fonderu la pista, y malapenes xubi a la rede. Ya verás cómo pierde'l partíu". Demientres pasaben los xuegos y los sets, el paisanu encaloriábase más y más, "foder col putu guaje, ¿que ye que nun ves qu'el rusu esti ye espertu en garrales toes no fonderu la rede? lamadrequelupario, será sunormal, ná, dende que ta forráu ya nin corre". Dacuando fino'l partíu, Rafa Nadal apuntose otra victoria pero l'espertu dicía que yera potra y qu'asina nun diba ganar más. Eso yera lo de menos, yo con él ya aprendiera a sacar, a garrar bien la raqueta, a liftar, a xubir a la rede, a botiar la pelota y fasta sacame'l calzonciellu del culu. Y quedaba lo caberu, el fútbol. Y ehi entamó'l terceru, qu'asemeyaba más calladín, pero bien que desgañitose en cuantes pusieron los resúmenes de la xornada fútbol. "Esto ya nun ye lo que yera, enantes sí que xugaben a fútbol y non como agora, con esos pelos, esos tatuaxes y eses mariconaes. Mira Guti, si paez una nenaza, nin corre, ni sabe dar un bon pase, nin va bien cola tiesta. Falten-yos coyones pa entrar duru como enantes, y non como agora que tan más pendientes de nun manchase que de xugar". Dempués de más de dos hores y media y clases teóriques, los tres espertos pidieron la cuenta y colaron del bar dempués de metese media caxa sidre en cuerpu. Despidiéronse y afuxeron arguyosos d'asoleyar so sabencia nel chigre. Yo, engañiteme pa empapame de too, agora ya sé que tengo que llevar el depósitu a medio enllenar, que les gomes bones son les blandes, que dacuando xuegue al tenis teo que da un reves llistáu sigún el vientu poniente, que teo que dosificame dacuando xuegue un partíu y que teo qu'amortisnar el balon col interior del pie. Solo quedame ponelo'n praútica.
3 espertos nun chigre
Publicar un comentario