Caxigalines: La Frialdá

David Castañón

Lo pior nun ye discutir, lo pior nun ye engarrase nin enfurruñase, lo pior nun ye oyer insultos nin llamatos, nin siquiera ye ser castrón. Lo pior ye la friura, el xelu, el frescayu, el frescaxe ... la frialdá. Abultar frieza, indiferencia ye lo pior. Falar con ella y sentir que ta ehí pero qu'a la vegada ta perlloñé d'elli, de ti. Falar del día, de lo que fixisti como un rixi-ruxe, como si tuvieres lleendo la riestra la compra: "Güei llevanteme, nel trabayu bien, el mesmu son, topé con Fulanín y entrugome polos dos, merqué daqué pa xintar y vine llamate, y tú cariño, que tal el día?", "Bien, bien, too bien, trabayé, tomé un café cola mio amiga y merqué daqué nel Corte Inglés", "Ah, vale, ok, bones nueches", "Bones nueches pa ti tamién, descansa". Falar por falar, sentir por costume, vivir de vezos.
Facer daqué p'afondar y topar una muria de xelu, escarbar afoyando un rellumu d'amor, un rellumu de vida y topase col "sí, cariño, yo tamien quierote" como'l que diz "aqui tien su BigMac", o pior.
Güei toca salir, güei toca cerveza colos tos amigos, güei toca facer l'amor ... Tar por tar, querer por querer.
Cómo topar la salía? Tas esperando pola so llamada con un "Quierote", pol so mensaxe con un "Señáldote abondo", pol so besu porque sí, pola so güeyada d'amor. Pero nun lo fae. Y tú demientres vas amurniando, vas sintiendo como día a día, poquiñín a poquiñín va creciendo la llamuerga pente los 2.
Vives cola esperancia de tornar a lo que foi, d'agospiala nos tos brazos como fixisti naquel tiempu llonxanu. Nagües porque torne al camín qu'entamasteis los dos n'andecha, nagües porque torne a ti. Pero nun quier, ya nun ta.
¿Y qué facer?
Podemos seguir como si nun pasara nada, y entos la llamuerga engrandonará fasta convertir l'amor pol cariñu, la plenitú pola compañía.
Podemos dexalo, y entos tolos dies fadrémonos la mesma entruga: "lluché tolo que tenia que lluchar?, fice tolo posible?"
Podemos falalo, y toparemos col "¿yo? ¿que fales? si a mí nun me pasa nada. Tas alloriau! Dexa de rayame" demientres pescancies que topasti la feria, pero que nun yes a curiala.
¿Y qué facer?

Etiquetes: Caxigalines |

0 Responses

Publicar un comentario

Etiquetes

Seguidores

Archivu