- Mira p'arriba. Tán los güelos na ventana. Di-yos alón.
- Güelita ta nuna y güelito ta na otra, ¿por qué s'asomen siempre en ventanes diferentes?
- Nun sé, zunes ... Será pa tener más sitiu.
- Güstame muncho qu'asomen pa despedinos. Que tean ellí, los dos asomaos mentes marchamos ye como una invitación pa que tornemos otru día.
- A ellos présta-yos muncho que vengas a velos. Gústa-yos muncho tar contigo.
- Y contigo ...
- Sí, fíu, conmigo tamién.
- A mí tamién me gusta tar con ellos. ¿Por qué esos edificios son toos iguales?
- Enantes facíen barriaes asina con tolos pisos iguales pa que vivieren los trabayadores de les empreses.
- Ye guapo mirar pa ellos dende equí y que toos seyan iguales.
- ¿Gústate de verdá?
- Creo que sí.
- Mira, tovía tán asomaos, anque seguro que yá nun nos ven.
- Pero saben que siguimos tando. Seguro que tán asomaos fasta qu'atopemos la estación.
- Mira ellí. Yá se ve la estación. Ta enllena xente.
- Sí. Too'l mundiu quier volver a casa.
|
|
Publicar un comentario