David López Castañón
Aportuna. Cova aportuna. Nun se-y puede negar tenacidá. Cova Tenaces, nómala so hermana ximielga, y enantes faciame gracia oyelo, pero agora que la sufro a diariu non. Yá non. Nun voi quitame la barba. Si quier, pue tar pidiéndolo cada minutu, pero nun voi faer casu. Esta vegada non. Yá son claudicaciones abondes. Primeru'l coletu. Val, aceuté que nun tengo edá pa llevalu y cortélu. Depués, los dientes. A nenguna de los mios ex moces importó-y que tuvieren mal aveníos. Pero llegó Cova y acabé con brackets. Dempués empeñóse en que vendiera la Harley y, anque opunxi fiera resistencia, terminé conduciendo un touterrén. Nun sé pa qué quiero esi armatroste si lo más vera que toi del campu ye cuando riego'l cactus que tengo enriba'l ordenador pa que quite les radiaciones. Colgué les botes del fútbol sala porque a Cova dába-y vergoña que saliera'l campu cola camiseta enllena a españar. Eso precedió a la dieta ultrarrápida que m'impunxo y que convirtió'l mio calter prestosu ya afayaizu nun permanente ceñu fruncíu, pasé a ser un cactus relleno de males radiaciones. Pasóseme citar otra rendición en toa riegla: el tabacu. Nin un pitu más. Nun quiero besar ceniceros, dicía ella, y dempués de someteme a dos meses d'astinencia sexual tiré la toalla. Hubo más derrotes, menos importantes anque igualmente significatives, que fixeron de mi un home sanu, bien vistíu, de perfectu dentame y encaramáu nun coche qu'acoyona. Cova coneuta con una parte de mi qu'algamara caltener a recaldu, porque, nun vamos engañemos, si me sintiera tan estropiáu polos sos cambeos y recambeos nun acabaría venciendo tantu terrén. ¿Quiesme polo que soi o polo que quies que sía?, entrugué-y dempués de que me convenciera pa esprendeme de la mio coleición de tebeos del «Jabato». Claro que te quiero por ti mesmu, pitufín, dixo ella poniéndose falagosa y tirándome con suavidá de la barba. Foi un anunciu de lo que dalgún día atreveríase a pidime. Ella sabía que la barba ye una de les mios señes d'identidá, y qu'ensin ella iba sentime indefensu. Pero Cova escoyó un oxetivu. Y ataca. Ayeri sosprendíla mirando per internet una web sobro máquines d'afaitar. Cuando pescanciose de la mio presencia, pesllóla y dedicóme la so güeyada de gata con ganes de que-y tasquen detrás de la oreya.

Share/Save/Bookmark
Etiquetes: | edit post
0 Responses

Publicar un comentario