Nun hai mayor aventura nesti mundu que la d'entamar un viaxe pel nuesu interior. Un viaxe nel qu'atopamos solos y ye bonu y necesariu que sía asina porque namás la soledá puede acovecer les verdaes que precisamos pa nun tresmananos en caminos d'aldu equivocáu, pa nun correr escontra horizontes onde namás nos espera la decepción o, lo que ye peor, el trunfu equivocáu, l'erru d'una victoria inservible. La odisea polos mios paisaxes escondíos nos que me siento foriata porque nun toi acostumada a visitalos ye'l mayor desafíu al que puedo enfrentame, mayor inclusive qu'averame a otros seres colos que se plantege la convivencia en cualquier sentíu, incluyíu'l sestu. Nun puede empecipiase esi viaxe comoquier, hai que preparalu bien. Hai que preparalu a xeitu. Dexar d'un llau los vezos que nos afueguen, poner a remueyu el secañu de los díes que se repiten hasta quitar la sede de fadiu, guardar cualquier tentación de buscar escuses nes obligaciones cotidianes que nos emprobecen cuando les faemos ensin emprestar atención, por inercia, por inútil necesidá. Si pones tola to enerxía n'estáu d'alerta, si salten toles tos alarmes p'avisate de cualquier mensaxe del l'universu qu'habita en ti, entós, y namás entós, vas tar preparada pa mirar de frente lo qu'hai dientro de ti, ensin mieu a les tiniebles y ensin desconfiar de les lluces qu'allumen zones xamás asoleyaes a la to propia y estraña conocencia. Namás un viaxe interior pue facilitanos los viaxes esteriores, namás una visita a les nueses virtúes y miseries ensin muries nin mázcares va dexanos reconocer y acolumbrar les razones de los demás y los nuesos deseos esenciales. Baxo nós, agazapaes, tán les respuestes que precisamos pa encarar los cambeos qu'esixe una vida plena, ensin arrenuncios nin arrepentimientos nin autoengaños. Basta con zarrar los güeyos, borrar la realidá, sentinos, suañanos ... Bon viaxe
Bon viaxe
Non tol mundu sabe faer esi viaxe y ser oxetivu, porque l'enclín ye xulgar a los demás ensin mirar los nuesos propios defectos.
A lo llargo del tiempu atopé con persones que censuren actitúes o fechu que primero o más tarde ellos mesmos facer.
Esi dichu que se ve'l la paya nel güeyu ayenu y non la viga n'el mesmu ye bien ciertu.
Asina que creo qu'esi viaxe non tol mundu tien capacidaes pa faelo. ;-)
Gracies pol comentariu, la verdá ye que ties muncha razón. Yo toi n'ello, intentándolo polo menos, que ya ye.
Pa tener placer dafechu nel viaxe fae falta escaecese de los problemes. Los de la xente tamién.
Gracies Adivín, ties muncha razón.
Oye, y esi blogue tan prestosu de Microrelatos?