¿Qué cómo asocedió too? Pues de la forma más fata y simple, que ye como suelen asoceder realmente les coses [cosiquines, cosines] importantes, ensin atropales nin persiguiles. Vayamos al entamu enantes de cuntar el final. Yo tarrezo los conciertos. Toos. Los de música clásica y los de pop. Los de rock y los de folk. Ya sé que soi daqué raru y que la mayoría les presones esfruten escuchando y medio güeyando a sos ídolos. A mí abúrreme, y la lliturxia apolmóname abondo, con toos esos brazos espurriéndose nel aire, esos mecheros allumandu un supuestu llirismu, esi deliriu n'andecha que remembra l'espíritu de la manada. De borregos. Por nun falar de la reciella que s'atorniella a les butaques pa escuchar frayones conciertos de pianu o etenres óperes, ensín el poder del mandu a distancia pa saltase les estayes rancies. Pero nun siempre puedo escaqueame y a vegaes caigo na trampa. Taba na dómina de lliquidación de restos dacuando Sonia convidome al conciertu d'un grupu abondo famosu, d'esos que van de poéticos a la vegada qu'intenten ser sollertes. Unos pesaos. En circunstancies normales, refugaría la invitación, pero rompiera facía 3 meses con Manuela, y ainda escarbaba na mio memoria pa fodeme dalguna qu'otra nueche, asina que barrunté: Sonia nun ye la muyer de mio vida pero de xuru que ye una perbona enfermera. Dafechu, estudia pa ello. Amás, ye guapa abondo como pa nun necesitar pasase coles cerveces pa xubise a so barra. Abulta zorramplón y lo sería si nun fora porqu'ella va detrás de lo mesmu: escaecer el ciruxanu casáu y con 3 fios del que namorose faciendo les praútiques. Esfarrapaos en vendaxes ambulantes, dambos metímonos nun conciertu enllenu xente que canciaba de memoria les lletres de los cancios, de xuru que la mayoría nun tenia na tiesta más qu'esos versos d'usar y tirar. Aguanté l'aguaceru polo menos una hora, pero cuando entamaron prendese los mecheros, colé pal bar buscando cerveces p'anestesiame. Sonia lloraba nesi momentu, abierta en canal pol bisturí de nun sé qué recuerdos. Detrás de la barra topé a una moza de güeyada llimpia y sorisa sucia, entafarrada con carmín ensangrentáu. Güeyámonos y pescancié ensín nenguna dubia que dalgún día esfarraparíame perdientro dacuando colara de mio vida.
|
|
Acabé de lleer el tu relatu con una sorrisa... Sí que ye raru que non te gustén los conciertos, pero tien qu'haber gustos pa tou. Yá ves lo que puede faer una muyer, y enriba si ye enfermera...;-).
Un saludin
Gracies pol comentariu maluferre.
El testu nun ye autobiográficu,eh? A mí los conciertos me prestan enforma!
Dafechu, esti 25 de Febreru colamos pa Madrid a ver a Dream Theater.
http://www.youtube.com/watch?v=mBCNLzhHYYo
Besinos