Préstenme los entamos d'añu porque m'anuncien que tou lo que va asoceder va ser nuevu y sorprendente. Gústame la sensación d'abrir el calendariu y velo enllenu de caxellos ensin cubrir, llimpios entá de compromisos y cola esperanza d'enllenalos de conquistes (pequeñes, ¿eh?, les proezas danme galbana), atrevencies y apuestes. Apostando siempres a caballu perdeor, non vaya a acostumame al ésitu y escaézame de que la vida namái tien sentíu cuando la dediques a engarrar por suaños inalcanzables. Anguaño, amás, quiero dedicalo a semar d'entrugues la mio vida. L'anterior dediquélu a topar respuestes. Les respuestes casi nunca t'esclarien les grandes duldes, quiciabes porque son un ardiluxu de la conciencia pa qu'atayemos l'estáu d'alerta y conformemos colo que tenemos. Y, sobremanera, colo que somos. Suelse llamar a esa rendición equilibriu cuando, en realidá, ye una amuesa clara de conformismu, y el que se conforma ye que nun tien fe en sí mesmu y perdióla nos sos suaños. Nun voi negar que se vive muncho más tranquila y serena cuando te paras a reparar to vida y descífresla como si fuera un manual d'instrucciones que sabes de memoria, pero pamique, como asocede na infancia, lo más risondero nun ye xugar, sinón desenvolver los regalos, cuando'l misteriu envolúbrase d'incógnita, y l'incógnita te fai tremecer los sentíos porque nun sabes lo que vien dempués nin lo que va pasar dientro de ti.
Asina que agora toca entrugues, nun quiero respuestes, anque les precise. Entrugues sobre lo que soi, pero, sobremanera, sobre lo que quiero ser. Quiero preguntar si toi nel camín xustu, y, si ye asina, si voi na dirección correuta y non p'atras o por esviadures que me distrayigan del horizonte que m'indique la brúxula de les mios intuiciones. Quiero preguntar si la neña qu'habita nel espeyu de la mio memoria confía en mi, y ta dispuesta a siguir conmigo desenvolviendo regalos, esperando temblones, precisando misterios que me dexen siguir viviendo ente interrogaciones.
Asina que agora toca entrugues, nun quiero respuestes, anque les precise. Entrugues sobre lo que soi, pero, sobremanera, sobre lo que quiero ser. Quiero preguntar si toi nel camín xustu, y, si ye asina, si voi na dirección correuta y non p'atras o por esviadures que me distrayigan del horizonte que m'indique la brúxula de les mios intuiciones. Quiero preguntar si la neña qu'habita nel espeyu de la mio memoria confía en mi, y ta dispuesta a siguir conmigo desenvolviendo regalos, esperando temblones, precisando misterios que me dexen siguir viviendo ente interrogaciones.
|
|
Publicar un comentario