Nun hai vasu mediu llenu o mediu vacíu, sinón secañu de cambéu. Pégo-y un tragu: el güisqui apierta más de lo qu'afuega. Piensu en Llibia, piensu en Gadafi. Pido otru güisqui. Brindo al aire, al vientu tibiu de les aspes del techu. Nesto, una mosca topeta contra'l mio vasu. Pese al impactu la mosca consigue remontar el vuelu. Yo non.
El mio coche sigue en doble fila, col WARNING prendíu y un cartelu del mio puñu y lletra a la vista de toos: “Toi nel chigre. Nun me pites: Xúnete”. Voi empecipiar la mio particular revolución n'este mesmu chigre. Ensin armes, nin cámares, nin micrófonos, namás güisqui. El mundu ta fechu mierda, collaciu. Los representantes del mio país faen semeyes con dictadores en cuenta de petroleo. Mohámed VI, Teodoro Obiang. Gadafi matando al so propiu pueblu. Repsol en Llibia. El motor del mio coche consume sangre humano. Fáenme cómpliz los mui fíos de puta.
Pido otru güisqui. La medrana de poder podreznos les coraes. El dineru. Les fronteres. Gobiernos que llimpien el culu col to votu. PSOE y PP, la mesma mierda ye. Políticos corruptos arrasando nes encuestes. José Bono visita al asesín Obiang y declara: “ye bien de más lo que nos xune que lo que nos dixebra”. El mesmu día, nolesvotes ye trending topic por mor de, atención, la Llei Sinde. A naide importa qu'apautemos con dictador pero, ¡cuidáu!, que nun nos toquen seriesyonkis.
Daquién entra nel chigre. Óyo-y dicir: “¿De quién ye esi coche?”. A la fin: el mio cartelu surdió efectu. Va ser otru enfastiáu con ganes d'atrincherase conmigo en pro de la sensatez.
Voltio escontra él. Ye un Policía Municipal. Píllame col güisqui na mano. Avérase.
- Doi-y dos opciones. O mueve'l so coche y sométo-y a un control d'alcoholemia, o llamo a la grúa.
Escueyo la segunda opción y pido otru güisqui. Voi siguir equí, na barra d'esti chigre, hasta que daquién s'andeche y comparta la mio llucha. O acabe en coma.
|
|
|
Por munchos guisquis que tomes el mundu nun va camudar, ye toa hipocresía. El mundu ta gobernáu pola economía...manden más les multinacionales que cualesquier politico. Los politicos son titeres en manos de los que remanen el dineru, asina que va faer semeyes con quien los venga bien nesi momentu.
Un abrazu collaciu.